బి.ఆర్.ఆక్స్ఫర్డ్ పాఠశాలలో ఘనంగా బాలల దినోత్సవ వేడుకలు

కందుకూరు పట్టణం లోని బి.ఆర్.ఆక్స్ఫర్డ్ పాఠశాలలో బాలల దినోత్సవ వేడుకలను శనివారం ఘనంగా నిర్వహించారు. ఈ సందర్భంగా విద్యాసంస్థల యాజమాన్య సిబ్బంది జవహర్‌లాల్ నెహ్రూ చిత్రపటానికి పూలమాల వేసి నివాళులర్పించారు. దేశాభివృద్ధికి నెహ్రూ చేసిన సేవలను, బాలల పట్ల ఆయనకున్న ప్రేమాభిమానాలను కొనియాడారు.

అనంతరం విద్యార్థులకు ఆటల పోటీలు నిర్వహించి విజేతలకు బహుమతులు అందజేశారు. విద్యార్థులు, ఉపాధ్యాయులకు భోజన సదుపాయం కల్పించారు. సాయంత్రం విద్యార్థుల సాంస్కృతిక ప్రదర్శనలు, నృత్యాలు ప్రత్యేక ఆకర్షణగా నిలిచాయి.

ఈ సందర్భంగా విద్యాసంస్థల చైర్మన్ ఉన్నం భాస్కరరావు మాట్లాడుతూ.. నేటి బాలలే రేపటి పౌరులని, వారికి నాణ్యమైన విద్యతో పాటు నైతిక విలువలు నేర్పించినప్పుడే దేశ భవిష్యత్తు ఉజ్వలంగా ఉంటుందని పేర్కొన్నారు. విద్యాసంస్థల  డైరెక్టర్ జి.బాలభాస్కర రావు మాట్లాడుతూ నెహ్రూ దూరదృష్టి, వినూత్న ఆలోచనలు దేశాభివృద్ధికి బాటలు వేశాయని, విద్యార్థులు ఆయన ఆశయాలను స్ఫూర్తిగా తీసుకొని ఉన్నత లక్ష్యాలను సాధించాలని ఆకాంక్షించారు.

ఈ కార్యక్రమంలో విద్యాసంస్థల కరస్పాండెంట్ బండి వెంకటేశ్వర్లు, డైరెక్టర్ బి.నరేంద్ర, డీన్, ప్రిన్సిపాల్స్, ఉపాధ్యాయులు, విద్యార్థులు పాల్గొన్నారు.