చనుబండ గ్రంథాలయంలో 59వ జాతీయ గ్రంథాలయ వారోత్సవాలు ప్రారంభం

బాలల దినోత్సవం సందర్భంగా నెహ్రూకు ఘన నివాళులు 

చాట్రాయి: ఏలూరు జిల్లా నూజివీడు నియోజకవర్గం చాట్రాయి మండలం చనుబండ శాఖా గ్రంథాలయంలో శనివారం 59వ జాతీయ గ్రంథాలయ వారోత్సవాల ప్రారంభోత్సవం, బాలల దినోత్సవ వేడుకలను నిర్వహించారు. భారత తొలి ప్రధాని జవహర్‌లాల్ నెహ్రూ జన్మదినాన్ని పురస్కరించుకుని నిర్వహించిన ఈ కార్యక్రమానికి ఉపాధ్యాయులు పి. రత్తయ్య, గ్రామ రెవెన్యూ అధికారి పి. శోభన్‌బాబు, పంచాయతీ గుమస్తా టి. సత్యనారాయణ ముఖ్య అతిథులుగా పాల్గొన్నారు. ఈ సందర్భంగా ఉపాధ్యాయులు పి. రత్తయ్య జవహర్‌లాల్ నెహ్రూ, గ్రంథాలయ పితామహుడు అయ్యంకి వెంకట రమణయ్య చిత్రపటాలకు పూలమాలలు వేసి ఘనంగా నివాళులర్పించారు. అనంతరం జాతీయ గ్రంథాలయ వారోత్సవాలను ప్రారంభించారు. ఈ సందర్భంగా విద్యార్థులను ఉద్దేశించి రత్తయ్య మాట్లాడుతూ దేశానికి జవహర్‌లాల్ నెహ్రూ అందించిన సేవలను వివరించారు. విద్యార్థులు ప్రతిరోజూ గ్రంథాలయానికి వచ్చి పుస్తక పఠనం అలవాటు చేసుకోవాలని సూచించారు. గ్రంథాలయంలో మంచి కథల పుస్తకాలతో పాటు వివిధ రంగాలకు సంబంధించిన అనేక పుస్తకాలు అందుబాటులో ఉన్నాయని, వాటిని చదవడం ద్వారా విజ్ఞానాన్ని పెంపొందించుకోవచ్చని తెలిపారు. 59వ జాతీయ గ్రంథాలయ వారోత్సవాల్లో భాగంగా నిర్వహించనున్న కార్యక్రమాల గురించి విద్యార్థులకు వివరించారు. ఈ కార్యక్రమానికి గ్రంథాలయాధికారి కె. శ్రీకాంత్ నిర్వహణ బాధ్యతలు చేపట్టారు.