తాగునీటితో ఫ్లోర్లు శుభ్రం చేసిన సంస్థకు రూ.20 వేల జరిమానా

జూబ్లీహిల్స్‌లో అక్షయకల్ప ఫార్మ్స్ అండ్ ఫుడ్స్‌పై వాటర్ బోర్డు చర్యలు

హైదరాబాద్ (ఎన్ టుడే న్యూస్): తాగునీటిని నిబంధనలకు విరుద్ధంగా వినియోగించిన జూబ్లీహిల్స్ జర్నలిస్ట్ కాలనీలోని అక్షయకల్ప ఫార్మ్స్ అండ్ ఫుడ్స్ ప్రైవేట్ లిమిటెడ్ సంస్థపై హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (HMWSSB) చర్యలు తీసుకుంది. సంస్థలో తాగునీటిని ఫ్లోర్లు శుభ్రం చేసేందుకు వినియోగిస్తున్నట్లు అధికారులు తనిఖీల్లో గుర్తించారు.

ఈ ఉల్లంఘనపై సంస్థకు రూ.20 వేల జరిమానా విధించడంతో పాటు, దానికి సంబంధించిన డ్రైనేజీ కనెక్షన్‌ను తాత్కాలికంగా తొలగించారు.

వేసవిలో తాగునీటి కొరతను దృష్టిలో పెట్టుకుని నగరవ్యాప్తంగా వాటర్ బోర్డు తనిఖీలను ముమ్మరం చేసింది. తాగునీటిని అనవసర అవసరాలకు వినియోగిస్తూ నిబంధనలు ఉల్లంఘించే వారిపై కఠిన చర్యలు తీసుకుంటామని అధికారులు హెచ్చరించారు.

తాగునీటిని కేవలం తాగడానికి, వంట అవసరాలకే వినియోగించాలని అధికారులు సూచించారు. ఫ్లోర్లు శుభ్రం చేయడం, వాహనాలు కడగడం, గార్డెనింగ్, నిర్మాణ పనుల కోసం ఎస్టీపీ (STP)లలో శుద్ధి చేసిన నీటిని వినియోగించాలని స్పష్టం చేశారు.

నగరంలో తాగునీటి వనరులను సంరక్షించేందుకు ప్రతి ఒక్కరూ బాధ్యతగా వ్యవహరించాలని, తాగునీటిని వృథా చేయకుండా పొదుపుగా వినియోగించాలని వాటర్ బోర్డు సూచించింది.