దసరా సెలవుల్లో తరగతులు నిర్వహించే పాఠశాలలు, కళాశాలలపై చర్యలు తీసుకోవాలి

ఎస్ఎఫ్ఐ తిరువూరు మండల కమిటీ డిమాండ్

తిరువూరు: ప్రభుత్వ నిబంధనలను ఉల్లంఘిస్తూ దసరా సెలవుల్లో తరగతులు నిర్వహించే పాఠశాలలు, కళాశాలల యాజమాన్యాలపై విద్యాశాఖ అధికారులు కఠిన చర్యలు తీసుకోవాలని ఎస్ఎఫ్ఐ తిరువూరు మండల అధ్యక్ష, కార్యదర్శులు ఎం. రాఖీ, ఎం. హర్ష డిమాండ్ చేశారు.

ఈ సందర్భంగా వారు మాట్లాడుతూ ఈ నెల 10వ తేదీ నుంచి ప్రభుత్వం దసరా సెలవులు ప్రకటించిన నేపథ్యంలో అన్ని పాఠశాలలు, కళాశాలలు ప్రభుత్వ నిబంధనలకు అనుగుణంగా విద్యార్థులకు సెలవులు ఇవ్వాలని కోరారు. సెలవుల సమయంలో అదనపు తరగతులు నిర్వహిస్తూ విద్యార్థులపై ఒత్తిడి తీసుకురాకుండా విద్యాసంస్థల యాజమాన్యాలకు విద్యాశాఖ అధికారులు స్పష్టమైన ఆదేశాలు జారీ చేయాలని సూచించారు.

ప్రభుత్వం ప్రకటించిన సెలవు రోజుల్లో తరగతులు నిర్వహించే విద్యాసంస్థలను గుర్తించి, నిబంధనలు ఉల్లంఘించిన యాజమాన్యాలపై కఠిన చర్యలు తీసుకోవాలని వారు కోరారు. విద్యార్థులకు ప్రభుత్వం ప్రకటించిన సెలవులను అమలు చేయడంలో అధికారులు నిర్లక్ష్యం వహించకుండా పర్యవేక్షణ చేపట్టాలని ఎస్ఎఫ్ఐ నాయకులు డిమాండ్ చేశారు.