ఏపీలో ఎన్నికల నగారా.. స్థానిక సంస్థల ఎన్నికలకు షెడ్యూల్ విడుదల

ఆంధ్రప్రదేశ్‌లో స్థానిక సంస్థల ఎన్నికల ప్రక్రియకు రాష్ట్ర ఎన్నికల సంఘం శ్రీకారం చుట్టింది. రాష్ట్రంలోని 10 నగర పంచాయతీలు, 77 మున్సిపాలిటీలు, 13 నగర పాలక సంస్థలకు ఎన్నికల నోటిఫికేషన్ విడుదల చేసింది.

నోటిఫికేషన్ ప్రకారం ఈ నెల 16 నుంచి 18 వరకు నామినేషన్ల స్వీకరణ జరగనుంది. 19న నామినేషన్ల పరిశీలన, 21 వరకు ఉపసంహరణకు అవకాశం ఉంటుంది. 28న పోలింగ్ నిర్వహించనుండగా, 30న ఫలితాలు ప్రకటించనున్నారు.

ఇక ఎంపీటీసీ, జడ్పీటీసీ ఎన్నికలకు నవంబర్ 3న పోలింగ్ నిర్వహించి, నవంబర్ 5న ఫలితాలు వెల్లడించనున్నారు. గ్రామ పంచాయతీ ఎన్నికలను మూడు విడతల్లో నిర్వహించేందుకు ఎన్నికల సంఘం షెడ్యూల్ ప్రకటించింది. నవంబర్ 26న తొలి విడత, నవంబర్ 29న రెండో విడత, డిసెంబర్ 2న మూడో విడత ఎన్నికలు జరగనున్నాయి. ఆయా విడతల్లో పోలింగ్ జరిగిన రోజే ఓట్ల లెక్కింపు చేపట్టనున్నారు.

స్థానిక సంస్థల ఎన్నికల నేపథ్యంలో ఈ రోజు నుంచి రాష్ట్రవ్యాప్తంగా ఎన్నికల ప్రవర్తనా నియమావళి (కోడ్‌) అమల్లోకి వచ్చింది. ఎన్నికల ప్రక్రియ పూర్తయ్యే వరకు ప్రభుత్వాలు, రాజకీయ పార్టీలు ఎన్నికల నిబంధనలు పాటించాల్సి ఉంటుంది.