ఏకగ్రీవం కోసం పదవుల వేలం.. జైలు శిక్ష, ఆరేళ్ల అనర్హత!
ఏకగ్రీవం కోసం పదవుల వేలం.. జైలు శిక్ష, ఆరేళ్ల అనర్హత!
అమరావతి: ఆంధ్రప్రదేశ్‌లో స్థానిక సంస్థల ఎన్నికల్లో ఏకగ్రీవం సాధించేందుకు వార్డు సభ్యుల పదవులను వేలం వేయడం చట్టవిరుద్ధమని రాష్ట్ర ఎన్నికల సంఘం (SEC) హెచ్చరించింది. ఇలాంటి అక్రమాలకు పాల్పడిన వారిపై కఠిన చర్యలు తీసుకుంటామని స్పష్టం చేసింది.
పదవుల వేలానికి పాల్పడిన వారికి ఏడాది జైలు శిక్షతో పాటు ఆరేళ్లపాటు ఎన్నికల్లో పోటీ చేయకుండా అనర్హత విధించే అవకాశం ఉందని ఎన్నికల సంఘం హెచ్చరించినట్లు సమాచారం.
వేలం ఆరోపణలపై విచారణ చేపట్టేందుకు ప్రత్యేక సెల్‌ను ఏర్పాటు చేయాలని SEC నిర్ణయించింది. ఆరోపణలు వచ్చిన ప్రాంతాల్లో సంబంధిత జిల్లా కలెక్టర్ అనుమతి లేకుండా ఏకగ్రీవ ఎన్నికల ఫలితాలను ప్రకటించరాదని స్పష్టం చేసింది.
వేలం జరిగినట్లు ప్రాథమిక ఆధారాలు లభిస్తే సంబంధిత వార్డుల్లో ఎన్నికల ప్రక్రియను నిలిపివేసే అధికారం రాష్ట్ర ఎన్నికల సంఘానికి ఉంటుందని పేర్కొంది. ఎన్నికలు పారదర్శకంగా, నిబంధనలకు అనుగుణంగా జరిగేలా చర్యలు తీసుకుంటామని తెలిపింది.
