బంజారాహిల్స్‌లో భారీ అగ్నిప్రమాదం : మంటల్లో కాలిపోయిన భారీగా మద్యం బాటిళ్లు..

బంజారాహిల్స్‌లో భారీ అగ్నిప్రమాదం : మంటల్లో కాలిపోయిన భారీగా మద్యం బాటిళ్లు..

11 మందిని సురక్షితంగా కాపాడిన ఫైర్ సిబ్బంది

 హైదరాబాద్‌ బంజారాహిల్స్‌లో శనివారం భారీ అగ్నిప్రమాదం చోటుచేసుకుంది. బంజారాహిల్స్‌ రోడ్‌ నంబర్‌ 11లోని బీఆర్కే న్యూస్‌ భవనంలోని సెల్లార్‌లో ఉన్న దారువాలా వైన్‌ మార్ట్‌ స్టాక్‌ స్టోరేజీలో ఒక్కసారిగా మంటలు చెలరేగాయి. దీంతో పరిసర ప్రాంతాల్లో తీవ్ర భయాందోళన నెలకొంది. సెల్లార్‌ నుంచి పెద్ద ఎత్తున పొగలు, మంటలు రావడాన్ని గమనించిన స్థానికులు వెంటనే అగ్నిమాపక సిబ్బందికి సమాచారం అందించారు. సమాచారం అందుకున్న ఫైర్‌ సిబ్బంది హుటాహుటిన సంఘటనా స్థలానికి చేరుకుని సహాయక చర్యలు చేపట్టారు. భవనంలో చిక్కుకున్న 11 మందిని సురక్షితంగా బయటకు తీసుకువచ్చారు.మంటలను అదుపులోకి తీసుకురావడానికి నాలుగు ఫైర్‌ ఇంజిన్లను వినియోగించారు. స్టాక్‌ స్టోరేజీలో పెద్ద మొత్తంలో మద్యం నిల్వ ఉండటంతో మంటలు వేగంగా వ్యాపించినట్లు తెలుస్తోంది. ఈ ప్రమాదంలో భారీగా మద్యం బాటిళ్లు అగ్నికి ఆహుతైనట్లు సమాచారం.అగ్నిప్రమాదానికి గల కారణాలు, ఆస్తి నష్టం వివరాలు పూర్తిగా తెలియాల్సి ఉంది. ఘటనపై అగ్నిమాపక, సంబంధిత అధికారులు దర్యాప్తు చేపట్టారు.