గీతాంజలి స్కూల్‌లో వైభవంగా బతుకమ్మ వేడుకలు
గీతాంజలి పాఠశాలలో ఘనంగా బతుకమ్మ వేడుకలు
కట్టంగూర్ (ఎన్‌ టుడే న్యూస్‌):
కట్టంగూర్ మండల కేంద్రంలోని గీతాంజలి ఇంగ్లీష్‌ మీడియం హైస్కూల్‌లో బతుకమ్మ వేడుకలను ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పాఠశాల విద్యార్థినులు, ఉపాధ్యాయులు ఉత్సాహంగా జరుపుకున్నారు.
ఈ సందర్భంగా విద్యార్థినులు వివిధ రకాల రంగురంగుల పూలతో బతుకమ్మలను అందంగా పేర్చారు. అనంతరం పాఠశాల ఆవరణలో బతుకమ్మలను ఏర్పాటు చేసి, వాటి చుట్టూ సంప్రదాయ పాటలు పాడుతూ, చప్పట్లు కొడుతూ ఉల్లాసంగా నృత్యాలు చేశారు. పాఠశాల ప్రాంగణం బతుకమ్మ పాటలతో సందడిగా మారింది.
ఈ సందర్భంగా పాఠశాల కరస్పాండెంట్‌ ఉష మాట్లాడుతూ.. నేటి తరానికి తెలంగాణ సంస్కృతి, సంప్రదాయాల గొప్పతనాన్ని తెలియజేయాలనే ఉద్దేశంతో ప్రతి సంవత్సరం పాఠశాలలో బతుకమ్మ వేడుకలను నిర్వహిస్తున్నట్లు తెలిపారు. చదువుతో పాటు సాంస్కృతిక కార్యక్రమాలు విద్యార్థుల్లో ఉత్సాహాన్ని నింపడంతో పాటు సంప్రదాయాల పట్ల అవగాహన పెంచుతాయని పేర్కొన్నారు.
ఈ కార్యక్రమంలో పాఠశాల ఉపాధ్యాయులు, విద్యార్థినులు, సిబ్బంది పెద్ద సంఖ్యలో పాల్గొన్నారు.
