జిల్లా స్థాయి వ్యాసరచన పోటీల్లో బయ్యారం విద్యార్థికి ప్రథమ బహుమతి

అభిరాం నాయక్‌కు జ్ఞాపికతో పాటు రూ.5 వేల నగదు పురస్కారం

బయ్యారం (ఎన్ టుడే న్యూస్), నవంబర్ 7: తెలంగాణ గుర్తింపు పొందిన పాఠశాలల యాజమాన్య సంఘం మహబూబాబాద్ జిల్లా శాఖ ఆధ్వర్యంలో నవంబర్ 7న నిర్వహించిన జిల్లా స్థాయి వ్యాసరచన పోటీల్లో బయ్యారం మండలానికి చెందిన అభిరాం నాయక్ ప్రథమ బహుమతి సాధించాడు. ఈ విజయంతో మండలానికి గుర్తింపు తీసుకురావడంపై పలువురు అభినందనలు తెలిపారు.

పీఆర్టీయూ బయ్యారం మండల అధ్యక్షుడు మోహన్ నాయక్ కుమారుడైన అభిరాం, పోటీల్లో అత్యుత్తమ ప్రతిభ కనబరిచి ప్రథమ స్థానంలో నిలిచాడు. ఈ సందర్భంగా జిల్లా రవాణా అధికారి శంకర్ నాయక్, రూరల్ సీఐ అంజలి చేతుల మీదుగా జ్ఞాపికతో పాటు రూ.5 వేల నగదు పురస్కారాన్ని అందుకున్నారు.

తమ కుమారుడి విజయానికి సహకారం, ప్రోత్సాహం అందించిన గీతాంజలి పాఠశాల యాజమాన్య బృందానికి అభిరాం తల్లిదండ్రులు మోహన్ నాయక్ దంపతులు ప్రత్యేక కృతజ్ఞతలు తెలిపారు. విద్యార్థుల్లోని ప్రతిభను గుర్తించి ప్రోత్సహిస్తే వారు మరిన్ని ఉన్నత విజయాలు సాధిస్తారని పేర్కొన్నారు.

అభిరాం సాధించిన విజయంపై బయ్యారం మండలానికి చెందిన పలువురు విద్యావేత్తలు, స్థానికులు అభినందనలు తెలిపారు.