భార్య వివాహేతర సంబంధం ప్రాథమికంగా రుజువైతే మధ్యంతర జీవనభృతి నిరాకరించవచ్చు

భార్య వివాహేతర సంబంధం ప్రాథమికంగా రుజువైతే మధ్యంతర జీవనభృతి నిరాకరించవచ్చు

సుప్రీంకోర్టు కీలక తీర్పు

న్యూఢిల్లీ: భార్య వివాహేతర సంబంధంలో ఉందని భర్త సమర్పించిన ఆధారాలు ప్రాథమికంగా స్పష్టం చేస్తే, ఆమెకు చెల్లించాల్సిన మధ్యంతర జీవనభృతిని నిరాకరించవచ్చని భారత సర్వోన్నత న్యాయస్థానం కీలక తీర్పు వెలువరించింది.

క్రిమినల్ ప్రొసీజర్ కోడ్ సెక్షన్ 125(4) ప్రకారం, భార్య వ్యభిచార సంబంధంలో ఉన్నట్లు ప్రాథమిక ఆధారాలు ఉన్న సందర్భంలో ఆ అంశాన్ని తుది విచారణ వరకు వాయిదా వేయాల్సిన అవసరం లేదని ధర్మాసనం స్పష్టం చేసింది.

జస్టిస్ సంజయ్ కరోల్, జస్టిస్ విపుల్ ఎం. పంచోలీలతో కూడిన ద్విసభ్య ధర్మాసనం ఈ తీర్పు ఇచ్చింది.

రాజస్థాన్‌కు చెందిన హిమాంశు చోర్డియా 2014లో వివాహం చేసుకున్నారు. కుటుంబ విభేదాల కారణంగా 2020లో భార్య తన బిడ్డతో కలిసి అత్తవారింటి నుంచి వెళ్లిపోయింది. అనంతరం ఆమె జీవనభృతి కోసం సెక్షన్ 125 కింద కోర్టును ఆశ్రయించింది.

దీనిపై భర్త స్పందిస్తూ, భార్య మరో వ్యక్తితో వివాహేతర సంబంధం కొనసాగిస్తోందని, సెక్షన్ 125(4) ప్రకారం ఆమెకు జీవనభృతి పొందే అర్హత లేదని వాదించారు. ఇందుకు మద్దతుగా కొన్ని ఛాయాచిత్రాలు, ఇతర ఆధారాలను కోర్టుకు సమర్పించారు.

అయితే ట్రయల్ కోర్టు ఆ ఆధారాల నిజానిజాలు తుది విచారణలో మాత్రమే తేలుతాయని పేర్కొంటూ భర్త అభ్యర్థనను తిరస్కరించింది. దీనిని హైకోర్టు కూడా సమర్థించింది.

దీనిపై భర్త సుప్రీంకోర్టును ఆశ్రయించగా, కింది కోర్టుల వైఖరిని ధర్మాసనం తప్పుబట్టింది. ప్రాథమిక ఆధారాలు ఉన్నప్పుడు మధ్యంతర దశలోనే ఆ అంశాన్ని పరిశీలించవచ్చని పేర్కొంది.

తుది తీర్పు వరకు వేచి చూడాలనే విధానం వల్ల సెక్షన్ 125(4) ఉద్దేశం నెరవేరదని సుప్రీంకోర్టు వ్యాఖ్యానించింది. కేసును తిరిగి ట్రయల్ కోర్టుకు పంపి, ఆధారాలు మరియు చట్టపరమైన అంశాల ఆధారంగా పునఃపరిశీలించాలని ఆదేశించింది.