ప్రధానమంత్రి ఆవాస్ యోజన పేరుతో మహిళకు వల.. గెస్ట్‌హౌస్‌లో అత్యాచారం

ఇల్లు మంజూరైందంటూ నమ్మించి మత్తు మందు కలిపిన పానీయం ఇచ్చిన నిందితుడు.. వీడియోతో బెదిరింపులు

మధుర: ఉత్తరప్రదేశ్‌లోని మధుర జిల్లాలో దారుణ ఘటన వెలుగుచూసింది. ప్రధానమంత్రి ఆవాస్ యోజన (PMAY) కింద ఇల్లు ఇప్పిస్తానని నమ్మించి ఓ మహిళపై అత్యాచారానికి పాల్పడినట్లు ఆరోపణలు ఎదుర్కొంటున్న అనిల్ కుమార్‌ను పోలీసులు అదుపులోకి తీసుకున్నారు. బాధితురాలి ఫిర్యాదు మేరకు కేసు నమోదు చేసి దర్యాప్తు చేపట్టారు.

పోలీసుల వివరాల ప్రకారం.. మధుర జిల్లాలోని బృందావన్ కొత్వాలి ప్రాంతానికి చెందిన ఓ మహిళ ప్రధానమంత్రి ఆవాస్ యోజన కింద ఇంటి కోసం దరఖాస్తు చేసుకుంది. ఈ క్రమంలో అనిల్ కుమార్ అనే వ్యక్తి ఆమెకు ఫోన్ చేసి, దరఖాస్తు ఆమోదం పొందిందని తెలిపాడు. అక్టోబర్ 30న ఆమెను ఓ ఖాళీ స్థలం వద్దకు తీసుకెళ్లి, అక్కడ ఉచితంగా ఇల్లు లభిస్తుందని నమ్మించినట్లు సమాచారం.

అనంతరం నవంబర్ 5న ఇంటి మంజూరుకు సంబంధించిన అధికారిక పత్రాలపై సంతకాలు చేయాలని చెప్పి మహిళను ఓ గెస్ట్‌హౌస్‌కు పిలిచాడు. అక్కడ ఆమెకు మత్తు మందు కలిపిన కూల్‌డ్రింక్ ఇచ్చినట్లు ఆరోపణలు ఉన్నాయి. అది తాగిన తర్వాత మహిళ స్పృహ కోల్పోవడంతో ఆమెపై అత్యాచారానికి పాల్పడినట్లు బాధితురాలు ఫిర్యాదులో పేర్కొంది.

అంతటితో ఆగకుండా, ఈ ఘటనను ఫోన్‌లో వీడియోగా రికార్డు చేసి, ఈ విషయం ఎవరికైనా చెబితే ఆ వీడియోను సోషల్ మీడియాలో పోస్ట్ చేస్తానని బెదిరించినట్లు తెలిపింది. నిందితుడి బెదిరింపుల నేపథ్యంలో బాధిత మహిళ పోలీసులను ఆశ్రయించింది.

బాధితురాలి ఫిర్యాదు స్వీకరించిన పోలీసులు అనిల్ కుమార్‌ను అదుపులోకి తీసుకున్నారు. నిందితుడిపై సంబంధిత సెక్షన్ల కింద కేసు నమోదు చేసి, ఘటనకు సంబంధించిన పూర్తి వివరాలపై దర్యాప్తు కొనసాగిస్తున్నారు.