కష్టకాలంలో స్నేహితుడి కుటుంబానికి అండగా బాల్యమిత్రులు

మానవత్వాన్ని చాటుకున్న కాంగ్రెస్ మండల నేతలు ఆకుతోట సతీష్, గుగులోతు మధు నాయక్‌తో పాటు స్నేహితులు

నెల్లికుదురు, నవంబర్ 11: స్నేహమంటే సంతోష సమయాల్లో తోడుగా ఉండటమే కాదని, ఆపద సమయంలో అండగా నిలిచి బాధ్యతను పంచుకోవడమే నిజమైన స్నేహానికి నిదర్శనమని కాంగ్రెస్ మండల నేతలు, బాల్యమిత్రులు ఆకుతోట సతీష్, గుగులోతు మధు నాయక్, మల్యాల అశోక్ అన్నారు. తమ బాల్యమిత్రుడు చిలుక రవి అకాల మరణంతో విషాదంలో ఉన్న ఆయన కుటుంబానికి ఆర్థిక సహాయం అందించి స్నేహబంధంలోని గొప్పతనాన్ని చాటుకున్నారు.

నెల్లికుదురు మండలంలోని కాచికల్ గ్రామానికి చెందిన చిలుక రవి ఇటీవల అకాల మరణం చెందడంతో ఆయన కుటుంబం తీవ్ర విషాదంలో మునిగిపోయింది. ఈ పరిస్థితుల్లో రవి బాల్యమిత్రులు తమ స్నేహితుడి కుటుంబానికి అండగా నిలవాలని నిర్ణయించుకున్నారు. స్నేహితులందరూ కలిసి ఆర్థిక సహాయాన్ని సమీకరించి, రవి కుమార్తె భవిష్యత్తుకు భరోసా కల్పించే ఉద్దేశంతో ఆమె పేరు మీద ఫిక్స్‌డ్ డిపాజిట్ చేశారు.

ఈ సందర్భంగా వారు మాట్లాడుతూ.. తమ మిత్రుడు రవి తమ మధ్య లేకపోయినా, ఆయన కుమార్తె తమ అందరి బిడ్డేనని భావిస్తున్నట్లు తెలిపారు. ఆమెకు ప్రేమాభిమానాలు పంచడంతో పాటు, కుటుంబానికి అవసరమైన సమయంలో అండగా నిలుస్తామని భరోసా ఇచ్చారు. స్నేహితుడి కుటుంబాన్ని ఒంటరిగా వదిలిపెట్టకుండా, జీవితాంతం తమ వంతు సహకారం అందిస్తామని స్పష్టం చేశారు.

అనంతరం కుటుంబ సభ్యులకు ఫిక్స్‌డ్ డిపాజిట్ బాండ్‌ను అందజేసి ధైర్యం చెప్పారు. రవి ఆత్మకు శాంతి చేకూరాలని భగవంతుడిని ప్రార్థించారు. ఈ కార్యక్రమానికి ఆర్థికంగా, ఇతర విధాలుగా సహకరించిన ప్రతి ఒక్క స్నేహితుడికి హృదయపూర్వక ధన్యవాదాలు తెలిపారు.

స్నేహితుడి మరణంతో బాధలో ఉన్న కుటుంబానికి బాల్యమిత్రులంతా ఒకటిగా నిలిచి ఆర్థిక భరోసా కల్పించడం స్థానికంగా అభినందనీయంగా నిలిచింది. స్నేహం అనేది మాటలకే పరిమితం కాకుండా, అవసరమైన సమయంలో చేతల్లో చూపించాలనే సందేశాన్ని ఈ సహాయ కార్యక్రమం చాటిచెప్పింది.