ఆరుగొలనుపేట అంగన్వాడీ కేంద్రంలో ఘనంగా బాలల దినోత్సవ వేడుకలు

చాట్రాయి: ఏలూరు జిల్లా నూజివీడు నియోజకవర్గం చాట్రాయి మండలం ఆరుగొలనుపేట గ్రామంలోని బీసీ అంగన్వాడీ కేంద్రంలో బాలల దినోత్సవ వేడుకలను అంగరంగ వైభవంగా నిర్వహించారు. ఈ సందర్భంగా అంగన్వాడీ కేంద్రాన్ని అందంగా అలంకరించి, మాజీ ప్రధాని జవహర్‌లాల్ నెహ్రూ చిత్రపటానికి పూలమాలలు వేసి ఘనంగా నివాళులర్పించారు. చిన్నారుల మధ్య ఆనందోత్సాహాల నడుమ వేడుకలు నిర్వహించి, బాలల దినోత్సవ ప్రాముఖ్యతను వారికి వివరించారు. ఈ సందర్భంగా అంగన్వాడీ కార్యకర్త జమలమ్మ, సహాయకురాలు లక్ష్మీ ప్రసన్న మాట్లాడుతూ బాలలే దేశ భవిష్యత్తు అని, ప్రతి చిన్నారికి నాణ్యమైన విద్య, పౌష్టికాహారం, మెరుగైన ఆరోగ్యం అందించడం ప్రతి ఒక్కరి బాధ్యత అని పేర్కొన్నారు. చిన్నారులను ప్రేమాభిమానాలతో పెంచుతూ, వారిలోని ప్రతిభను గుర్తించి ప్రోత్సహించాలని సూచించారు. బాలల దినోత్సవం పిల్లలకు ఆనందాన్ని పంచడమే కాకుండా, వారి హక్కులు, సమగ్ర అభివృద్ధి పట్ల సమాజానికి బాధ్యతను గుర్తు చేస్తుందని తెలిపారు.