రోడ్డుపై భిక్షాటన చేస్తున్న చిన్నారులను చేరదీసిన సీఐ
“చదువుకుంటారా.. చదివిస్తా” అంటూ ఆప్యాయంగా పలకరింపు
జగిత్యాల: చేతుల్లో పుస్తకాలు పట్టుకుని బడికి వెళ్లాల్సిన చిన్నారులు రోడ్డుపై భిక్షాటన చేస్తుండటం గమనించిన జగిత్యాల పట్టణ సీఐ కరుణాకర్ వెంటనే స్పందించారు. తహసీల్ చౌరస్తా వద్ద విధులకు వెళ్తున్న సమయంలో తల్లిదండ్రులతో కలిసి భిక్షాటన చేస్తున్న నాలుగైదేళ్ల వయసున్న ఇద్దరు చిన్నారులను ఆయన గుర్తించారు.
వెంటనే వాహనాన్ని ఆపి చిన్నారుల వద్దకు వెళ్లిన సీఐ కరుణాకర్ వారిని ఆప్యాయంగా పలకరించారు. “చదువుకుంటారా.. మిమ్మల్ని చదివిస్తా” అంటూ చిన్నారులతో మాట్లాడి వారిలో భరోసా కల్పించారు.
పోలీసు అధికారి వెంట వస్తామని చిన్నారులు చెప్పడంతో వారిని ఆటోలో ఎక్కించి సురక్షితంగా తరలించారు. అనంతరం జిల్లా బాలల సంరక్షణ అధికారులకు సమాచారం అందించారు. చిన్నారుల భద్రత, విద్య, సంక్షేమానికి సంబంధించి తదుపరి చర్యలు చేపట్టే ప్రక్రియను ప్రారంభించారు.
విధుల్లో భాగంగా వెళ్తున్న సమయంలో చిన్నారుల పరిస్థితిని గమనించి వెంటనే స్పందించిన సీఐ కరుణాకర్ చొరవపై పలువురు అభినందనలు వ్యక్తం చేస్తున్నారు. బాలల భద్రత, విద్య, సంక్షేమంపై పోలీసు శాఖతో పాటు సంబంధిత అధికారులు ప్రత్యేక దృష్టి సారించాల్సిన అవసరాన్ని ఈ ఘటన చాటిచెప్పింది.
