విశాఖలో సీఐఐ అంతర్జాతీయ భాగస్వామ్య సదస్సు..

రూ.12.14 లక్షల కోట్ల పెట్టుబడులే లక్ష్యం 2.46 లక్షల మందికి ఉపాధి అవకాశాలు కల్పించే దిశగా ప్రభుత్వం అడుగులు ఆంధ్రప్రదేశ్‌లో పెట్టుబడుల ఆకర్షణే లక్ష్యంగా విశాఖపట్నంలో సీఐఐ ఆధ్వర్యంలో అంతర్జాతీయ భాగస్వామ్య సదస్సు నిర్వహణకు ఏర్పాట్లు ముమ్మరంగా సాగుతున్నాయి. ఈ సదస్సుకు కేంద్ర వాణిజ్య, పరిశ్రమల శాఖ మంత్రి పీయూష్ గోయల్ ముఖ్య అతిథిగా హాజరుకానున్నారు. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్ కూడా పాల్గొననున్నారు. ఈ అంతర్జాతీయ సదస్సుకు 18 దేశాలకు చెందిన మంత్రులు, 40 మంది అంతర్జాతీయ వక్తలు హాజరుకానున్నారు. చిన్న, మధ్యతరహా పరిశ్రమల (ఎంఎస్ఎంఈ) ప్రాధాన్యతను వివరించేలా ప్రత్యేక ప్రదర్శన ఏర్పాటు చేస్తున్నారు. సదస్సు నిర్వహణ కోసం ప్రధాని సమావేశ మందిరంతో పాటు నాలుగు ప్రత్యేక హాళ్లను సిద్ధం చేస్తున్నారు. ఈ సదస్సు ద్వారా రాష్ట్రానికి భారీ పెట్టుబడులను తీసుకురావడంపై ప్రభుత్వం దృష్టి సారించింది. మొత్తం 141 సంస్థలతో అవగాహన ఒప్పందాలు కుదుర్చుకునేందుకు కసరత్తు చేస్తోంది. వీటి ద్వారా సుమారు రూ.12.14 లక్షల కోట్ల పెట్టుబడులు వచ్చే అవకాశం ఉందని అంచనా వేస్తున్నారు. ఈ పెట్టుబడుల ద్వారా రాష్ట్రంలో 2.46 లక్షల మందికి ఉపాధి అవకాశాలు లభిస్తాయని ప్రభుత్వం భావిస్తోంది. అంతర్జాతీయ పారిశ్రామిక సంస్థలను ఆకర్షించి రాష్ట్రంలో పరిశ్రమల అభివృద్ధికి బాటలు వేయడమే ఈ సదస్సు ప్రధాన లక్ష్యంగా కనిపిస్తోంది.