గొల్లపల్లి జడ్పీ ఉన్నత పాఠశాలలో విద్యా కమిటీ ఎన్నికల వేళ ఘర్షణ

త్రిపురాంతకం: మార్కాపురం జిల్లా త్రిపురాంతకం మండలం గొల్లపల్లి జడ్పీ ఉన్నత పాఠశాలలో శనివారం నిర్వహించిన విద్యా కమిటీ ఎన్నికలు ఉద్రిక్తతకు దారితీశాయి. ఎన్నికల సమయంలో ఇరు వర్గాల మధ్య మాటామాటా పెరగడంతో ఘర్షణ చోటుచేసుకున్నట్లు సమాచారం.

ఈ క్రమంలో ఇరు వర్గాల వారు ఒకరిపై ఒకరు రాళ్లు రువ్వుకున్నట్లు తెలుస్తోంది. ఈ ఘటనలో పలువురికి స్వల్ప గాయాలైనట్లు సమాచారం.

సమాచారం అందుకున్న పోలీసులు ఘటనా స్థలానికి చేరుకుని లాఠీచార్జ్ చేసి పరిస్థితిని అదుపులోకి తీసుకువచ్చారు. ఎన్నికల సమయంలో ఘర్షణ చోటుచేసుకోవడంతో స్థానికులు ఆందోళన వ్యక్తం చేశారు.

ఘటనకు సంబంధించి పూర్తి వివరాలు తెలియాల్సి ఉంది. పోలీసులు పరిస్థితిని పర్యవేక్షిస్తూ, ఘర్షణకు దారితీసిన కారణాలపై వివరాలు సేకరిస్తున్నారు.