సదర్ ఉత్సవాలకు సీఎం రేవంత్ రెడ్డికి ఆహ్వానం
- నవంబర్ 4న హైదరాబాద్ ఎన్టీఆర్‌ స్టేడియంలో సదర్ ఉత్సవాలు
- సదర్ ఉత్సవాలను రాష్ట్ర పండుగగా ప్రకటించినందుకు కృతజ్ఞతలు
హైదరాబాద్, అక్టోబర్ 28: హైదరాబాద్‌లోని ఎన్టీఆర్‌ స్టేడియంలో నవంబర్ 4న నిర్వహించనున్న సదర్ ఉత్సవాలకు హాజరుకావాలని శ్రీకృష్ణ సదర్ సమ్మేళనం ఉత్సవ కమిటీ ప్రతినిధులు ముఖ్యమంత్రి ఎ. రేవంత్ రెడ్డిని ఆహ్వానించారు. ఈ మేరకు కమిటీ ప్రతినిధులు జూబ్లీహిల్స్‌లోని ముఖ్యమంత్రి నివాసంలో ఆయనను కలిశారు.
సదర్ ఉత్సవాలను రాష్ట్ర పండుగగా ప్రకటించినందుకు కమిటీ ప్రతినిధులు ముఖ్యమంత్రికి కృతజ్ఞతలు తెలిపారు. నవంబర్ 4న నిర్వహించనున్న ఉత్సవాలకు హాజరై కార్యక్రమాన్ని విజయవంతం చేయాలని కోరారు.
ఈ కార్యక్రమంలో శ్రీకృష్ణ సదర్ సమ్మేళనం ఉత్సవ కమిటీ ఛైర్మన్, మాజీ ఎంపీ అంజన్ కుమార్ యాదవ్, రాజ్యసభ సభ్యుడు అనిల్ కుమార్ యాదవ్, జూబ్లీహిల్స్ ఎమ్మెల్యే నవీన్ యాదవ్, యాదగిరిగుట్ట బోర్డు సభ్యురాలు ఈశ్వరమ్మ యాదవ్, మేడ్చల్ డీసీసీ అధ్యక్షుడు వజ్రేష్ యాదవ్‌తో పాటు పలువురు కమిటీ ప్రతినిధులు పాల్గొన్నారు.
