తెలంగాణలో పెరగనున్న చలి తీవ్రత..

 పలు జిల్లాల్లో 13 డిగ్రీలకు పడిపోనున్న ఉష్ణోగ్రతలు!

హైదరాబాద్: తెలంగాణ రాష్ట్రవ్యాప్తంగా చలి తీవ్రత మరింత పెరిగే అవకాశం ఉందని వాతావరణ నిపుణులు అంచనా వేస్తున్నారు. ముఖ్యంగా పశ్చిమ, ఉత్తర, మధ్య తెలంగాణ జిల్లాల్లో రేపు కనిష్ఠ ఉష్ణోగ్రతలు 13 డిగ్రీల సెల్సియస్‌కు పడిపోయే అవకాశం ఉందని తెలిపారు. హైదరాబాద్ నగరంలోనూ ఉష్ణోగ్రతలు 14 డిగ్రీల సెల్సియస్‌కు చేరవచ్చని పేర్కొన్నారు.

ఉష్ణోగ్రతలు తగ్గుముఖం పట్టే నేపథ్యంలో ఉదయం, రాత్రి వేళల్లో చలి ప్రభావం ఎక్కువగా ఉండే అవకాశం ఉంది. దీంతో ప్రజలు చలి నుంచి రక్షణ పొందేందుకు తగిన జాగ్రత్తలు తీసుకోవాలని సూచిస్తున్నారు. ముఖ్యంగా వృద్ధులు, చిన్నపిల్లలు ఉదయం, రాత్రి వేళల్లో బయటకు వెళ్లేటప్పుడు వెచ్చని దుస్తులు ధరించాలని సూచిస్తున్నారు.

మరోవైపు రాష్ట్రంలోని దక్షిణ, తూర్పు తెలంగాణ జిల్లాలతో పాటు హైదరాబాద్‌లోని కొన్ని ప్రాంతాల్లో అక్కడక్కడా తేలికపాటి వర్షాలు కురిసే అవకాశం ఉందని వాతావరణ నిపుణులు వెల్లడించారు. మధ్యాహ్నం నుంచి రాత్రి వేళల్లో ఈ వర్షాలు కురిసే అవకాశం ఉందని అంచనా వేశారు.

అయితే మిగిలిన ప్రాంతాల్లో ప్రధానంగా పొడి వాతావరణం కొనసాగుతుందని తెలిపారు. చలి తీవ్రత పెరగడంతో పాటు కొన్ని ప్రాంతాల్లో వర్ష సూచన ఉన్న నేపథ్యంలో ప్రజలు వాతావరణ పరిస్థితులను గమనిస్తూ అప్రమత్తంగా ఉండాలని సూచించారు.