అమెరికాలో అదృశ్యమైన నల్లగొండ విద్యార్థిని కోయ శ్రీజ రెడ్డి..

ఆచూకీ కోసం కుటుంబ సభ్యుల ఆందోళన

నల్లగొండ: ఉన్నత చదువుల కోసం అమెరికా వెళ్లిన తెలంగాణకు చెందిన విద్యార్థిని కోయ శ్రీజ రెడ్డి అదృశ్యం కావడం కలకలం రేపుతోంది. నల్లగొండ జిల్లా కనగల్ మండలం సుబ్బులాపురం గ్రామానికి చెందిన శ్రీజ అమెరికాలోని బోస్టన్‌లో ఎంఎస్ చదువుతోంది. చదువుతో పాటు పార్ట్‌టైమ్ ఉద్యోగం కూడా చేస్తోంది.

ఈ నెల 2వ తేదీన వాకింగ్‌కు వెళ్లిన శ్రీజ తిరిగి రాకపోవడంతో కుటుంబ సభ్యులు ఆందోళనకు గురయ్యారు. ఆమె కోసం ఆరా తీసినప్పటికీ ఆచూకీ లభించకపోవడంతో అమెరికా పోలీసులకు సమాచారం అందించారు. దీంతో పోలీసులు ఆమె అదృశ్యంపై విచారణ చేపట్టారు.

అమెరికా పోలీసుల సమాచారం ప్రకారం.. కార్సన్ బీచ్ హార్బర్ ప్రాంతంలో శ్రీజ ఫోన్ చివరిసారిగా లొకేషన్‌లో గుర్తించినట్లు తెలుస్తోంది. అయితే ఆమె అక్కడి నుంచి ఎటువైపు వెళ్లింది? ప్రస్తుతం ఎక్కడ ఉంది? అనే విషయాలు తెలియాల్సి ఉంది. పోలీసులు వివిధ కోణాల్లో ఆమె ఆచూకీ కోసం ప్రయత్నిస్తున్నట్లు సమాచారం.

మరోవైపు తమ కుమార్తె అదృశ్యమవడంతో తల్లిదండ్రులు యాదగిరి రెడ్డి, రూప తీవ్ర ఆందోళన చెందుతున్నారు. తమ కుమార్తెను క్షేమంగా ఇంటికి తీసుకురావడానికి అధికారులు అవసరమైన చర్యలు చేపట్టాలని వేడుకుంటున్నారు.

ఈ ఘటనపై నల్లగొండ జిల్లా కలెక్టర్ స్పందించి విషయాన్ని రాష్ట్ర ప్రభుత్వ దృష్టికి తీసుకెళ్లినట్లు సమాచారం. శ్రీజ ఆచూకీ గుర్తించి ఆమెను సురక్షితంగా కుటుంబ సభ్యుల వద్దకు చేర్చేందుకు సంబంధిత అధికారులు సహకరించాలని కుటుంబ సభ్యులు కోరుతున్నారు.