ఆళ్లగడ్డలో రేపు ఉదయం 8 గంటలకు ఓట్ల లెక్కింపు ప్రారంభం

ఆళ్లగడ్డ (ఎన్ టుడే న్యూస్):

ఆళ్లగడ్డ మండలంలో నిర్వహించిన ఎంపీటీసీ, జెడ్పీటీసీ ఎన్నికలకు సంబంధించిన ఓట్ల లెక్కింపు శనివారం ఉదయం 8 గంటలకు ప్రారంభం కానుంది. ఇందుకోసం ఆళ్లగడ్డలోని వైపీపీఎం ఉన్నత పాఠశాలలో అధికారులు ప్రత్యేక ఏర్పాట్లు చేశారు.

మండల పరిధిలోని మొత్తం 10 ఎంపీటీసీ స్థానాలు, ఒక జెడ్పీటీసీ స్థానానికి సంబంధించిన ఓట్లను ఇదే కేంద్రంలో లెక్కించనున్నారు. ఓట్ల లెక్కింపు ప్రక్రియకు అవసరమైన అన్ని ఏర్పాట్లను పూర్తి చేసినట్లు రిటర్నింగ్ అధికారి హరి గోపాల్, అసిస్టెంట్ రిటర్నింగ్ అధికారి నూర్జహాన్ తెలిపారు.

ఓట్ల లెక్కింపు సజావుగా, పారదర్శకంగా నిర్వహించేందుకు అవసరమైన సిబ్బందిని నియమించినట్లు అధికారులు వెల్లడించారు. లెక్కింపు కేంద్రంలో ఎలాంటి అవాంఛనీయ సంఘటనలు చోటుచేసుకోకుండా కట్టుదిట్టమైన భద్రతా ఏర్పాట్లు చేసినట్లు మీడియాకు వివరించారు.

లెక్కింపు కేంద్రం వద్ద భద్రత, క్రమశిక్షణకు ప్రాధాన్యత ఇస్తూ అవసరమైన చర్యలు తీసుకున్నట్లు తెలిపారు. ఎన్నికల ఫలితాల కోసం అభ్యర్థులు, రాజకీయ పార్టీల నాయకులు, కార్యకర్తలు, ప్రజలు ఆసక్తిగా ఎదురుచూస్తున్నారు.

శనివారం ఉదయం ప్రారంభం కానున్న ఓట్ల లెక్కింపుతో మండలంలోని 10 ఎంపీటీసీ స్థానాలు, ఒక జెడ్పీటీసీ స్థానానికి సంబంధించిన ఎన్నికల ఫలితాలపై స్పష్టత రానుంది.