పంటలు ఎండిపోతున్నాయి.. చెరువుల్లోకి గోదావరి జలాలు విడుదల చేయాలి

జనగామ: చెరువుల్లో నీరు లేక పంటలు ఎండిపోతున్నాయని, వెంటనే గోదావరి జలాలను విడుదల చేసి తమ పంటలను కాపాడాలని డిమాండ్ చేస్తూ వడ్లకొండ, పెద్దపహాడ్ గ్రామాల రైతులు శుక్రవారం జనగామ–హుస్నాబాద్ ప్రధాన రహదారిపై ధర్నా నిర్వహించారు.

చెరువుల్లో నీరు లేక పంటలు ఎండిపోతుండటంతో రైతులు తీవ్ర ఆవేదన వ్యక్తం చేశారు. సాగు కోసం పెట్టిన పెట్టుబడులు వృథా అవుతున్నాయని ఆందోళన చెందారు. తమ పంటలను కాపాడేందుకు ప్రభుత్వం తక్షణమే స్పందించి చెరువుల్లోకి గోదావరి జలాలను విడుదల చేయాలని డిమాండ్ చేశారు.

నిరసనలో భాగంగా రైతులు పురుగుమందు డబ్బాలు, ఎండిపోయిన గడ్డితో ఆందోళన చేపట్టారు. తమ సమస్యను అధికారుల దృష్టికి తీసుకెళ్లేందుకు ప్రయత్నిస్తూ, పరిష్కారం చూపాలని పోలీసుల కాళ్లు మొక్కి వేడుకున్నారు.

పంటలు ఎండిపోతున్నా పట్టించుకోవడం లేదని రైతులు ఆవేదన వ్యక్తం చేశారు. ప్రభుత్వం వెంటనే స్పందించి సాగునీరు అందించే చర్యలు తీసుకోవాలని కోరారు. రైతుల ధర్నాతో జనగామ–హుస్నాబాద్ ప్రధాన రహదారిపై కొంతసేపు ఉద్రిక్త పరిస్థితులు నెలకొన్నాయి.