ఆస్పత్రుల్లో చికిత్సల ధరల ప్రదర్శన తప్పనిసరి!
ఆస్పత్రుల్లో చికిత్సల ధరల ప్రదర్శన తప్పనిసరి!
ఇంగ్లిష్‌తో పాటు స్థానిక భాషలోనూ రేట్లు వెల్లడించాలి
న్యూఢిల్లీ: దేశంలోని అన్ని ఆస్పత్రుల్లో అందించే చికిత్సలకు సంబంధించిన ధరలను ప్రదర్శించేలా చర్యలు తీసుకోవాలని కేంద్ర ప్రభుత్వం రాష్ట్రాలను ఆదేశించింది. ఈ మేరకు అన్ని రాష్ట్రాల ప్రధాన కార్యదర్శులకు లేఖలు రాసింది. ప్రతి చికిత్సకు సంబంధించిన ధరల వివరాలను ఇంగ్లిష్‌తో పాటు స్థానిక భాషలోనూ అందుబాటులో ఉంచాలని సూచించింది.
ఈ నిబంధన అమలయ్యేలా చూడాల్సిన బాధ్యత రాష్ట్ర ప్రభుత్వాలదేనని కేంద్రం స్పష్టం చేసింది. ఆస్పత్రుల్లో చికిత్సల ఖర్చులపై రోగులకు ముందుగానే అవగాహన కల్పించడం, బిల్లుల విషయంలో తలెత్తే వివాదాలు, ఫిర్యాదులను తగ్గించడం ఈ నిర్ణయం ప్రధాన ఉద్దేశమని పేర్కొంది.
చికిత్సల ధరలు బహిరంగంగా ప్రదర్శించడం ద్వారా వైద్య ఖర్చుల విషయంలో పారదర్శకత పెరుగుతుందని, రోగులు, వారి కుటుంబ సభ్యులకు చికిత్సకు అయ్యే వ్యయంపై స్పష్టత లభిస్తుందని కేంద్రం భావిస్తోంది.
