121 మంది లబ్ధిదారులకు ఇళ్ల మంజూరు పత్రాల పంపిణీ

బయ్యవరం: పేదల సంక్షేమమే లక్ష్యంగా కూటమి ప్రభుత్వం పనిచేస్తోందని పెదకూరపాడు ఎమ్మెల్యే భాష్యం ప్రవీణ్ అన్నారు. క్రోసూరు మండలం బయ్యవరం గ్రామంలో నియోజకవర్గ వ్యాప్తంగా 121 మంది లబ్ధిదారులకు ఇళ్ల మంజూరు పత్రాలను ఆయన పంపిణీ చేశారు.

ఈ సందర్భంగా ఎమ్మెల్యే మాట్లాడుతూ అర్హులైన పేదలకు సొంతింటి కలను సాకారం చేయడమే కూటమి ప్రభుత్వ ధ్యేయమని తెలిపారు. ఒక్కో ఇంటి నిర్మాణానికి ప్రభుత్వం రూ.2.89 లక్షల చొప్పున ఆర్థిక సాయం అందించిందని పేర్కొన్నారు.

ప్రజలకు ఇచ్చిన హామీలను నెరవేరుస్తూ, అర్హులైన ప్రతి ఒక్కరికీ ప్రభుత్వ సంక్షేమ పథకాల ఫలాలు అందేలా కృషి చేస్తున్నామని ఎమ్మెల్యే తెలిపారు. పేదల జీవన ప్రమాణాలను మెరుగుపరచడమే లక్ష్యంగా ప్రభుత్వం పలు సంక్షేమ కార్యక్రమాలను అమలు చేస్తోందని చెప్పారు.

రానున్న స్థానిక సంస్థల ఎన్నికల్లో కూటమి అభ్యర్థుల విజయానికి నాయకులు, కార్యకర్తలు సమన్వయంతో పనిచేయాలని భాష్యం ప్రవీణ్ పిలుపునిచ్చారు.

ఈ కార్యక్రమంలో జనసేన నియోజకవర్గ ఇన్‌చార్జి, మండల పార్టీ అధ్యక్షులు, కూటమి ముఖ్య నాయకులు పాల్గొన్నారు.