బయ్యారం హైస్కూల్ విద్యార్థులకు పాఠశాల బ్యాగుల పంపిణీ

కోగ్టా ఫైనాన్షియల్, వీకే ఫౌండేషన్ సంయుక్త ఆధ్వర్యంలో కార్యక్రమం

బయ్యారం, అక్టోబర్ 30 (ఎన్ టుడే న్యూస్):

ప్రభుత్వ పాఠశాలల్లో చదువుతున్న విద్యార్థులను ప్రోత్సహించి, వారి విద్యాభివృద్ధికి తోడ్పడాలనే లక్ష్యంతో కోగ్టా ఫైనాన్షియల్ (ఇండియా) లిమిటెడ్, వసుధైక కుటుంబం (వీకే ఫౌండేషన్) సంయుక్తంగా ముందుకొచ్చాయి. ఇందులో భాగంగా మహబూబాబాద్ జిల్లా బయ్యారం జెడ్పీహెచ్‌ఎస్ బాలుర ఉన్నత పాఠశాల విద్యార్థులకు గురువారం పాఠశాల బ్యాగులను పంపిణీ చేశారు.

విద్యార్థులు ఉన్నత లక్ష్యాలను చేరుకోవాలి

ఈ సందర్భంగా ముఖ్య అతిథులు మాట్లాడుతూ విద్యార్థుల చదువుకు ఆర్థిక పరిస్థితులు అడ్డంకి కాకూడదని అన్నారు. ప్రతి విద్యార్థి క్రమశిక్షణ, పట్టుదల, నిరంతర శ్రమతో విద్యనభ్యసించి ఉన్నత శిఖరాలను అధిరోహించాలని సూచించారు. ప్రభుత్వ పాఠశాలల విద్యార్థుల సంక్షేమం, విద్యాభివృద్ధి కోసం స్వచ్ఛంద సంస్థలు చేస్తున్న సేవలు అభినందనీయమని కొనియాడారు.

పలువురు ప్రముఖుల హాజరు

ఈ కార్యక్రమానికి బయ్యారం సర్పంచ్ గుగులోత్ శాంతి కిషన్ నాయక్, ఎంఈఓ లక్ష్మణరావు, ఎంపీడీవో దీపిక, ఎస్‌ఐ ప్రశాంత్ బాబు, ఎఫ్‌ఏసీహెచ్‌ఎం ఎం. ధనుంజయ్, టీఎస్‌టిటీఎఫ్ అధ్యక్షుడు భద్ర నాయక్ ముఖ్య అతిథులుగా హాజరయ్యారు.

విద్యార్థులకు బ్యాగులు అందించేందుకు ప్రత్యేక చొరవ తీసుకుని, వాటిని పాఠశాలకు తీసుకురావడంలో కీలక పాత్ర పోషించిన భానోతు రవీందర్‌తో పాటు కోగ్టా ఫైనాన్షియల్ సంస్థ, వీకే ఫౌండేషన్ ప్రతినిధులను పలువురు అభినందించారు.

ఈ కార్యక్రమంలో ఉపాధ్యాయులు రామేశ్వరరావు, లక్ష్మీనారాయణ, దస్తగిరి, కొలిపాక శ్రీనివాస్, లక్ష్మయ్య, ఆర్. వెంకటేశ్వర్లు, కళావతి తదితరులు పాల్గొన్నారు.