మాజీ మంత్రి శత్రుచర్ల విజయరామరాజు కన్నుమూత

78 ఏళ్ల వయసులో తుదిశ్వాస.. విశాఖపట్నంలోని ఆసుపత్రిలో చికిత్స పొందుతూ మృతి

మాజీ మంత్రి, సీనియర్ రాజకీయ నాయకుడు శత్రుచర్ల విజయరామరాజు (78) కన్నుమూశారు. కొంతకాలంగా అనారోగ్యంతో బాధపడుతున్న ఆయన విశాఖపట్నంలోని ఆసుపత్రిలో చికిత్స పొందుతూ తుదిశ్వాస విడిచారు. ఆయన మరణవార్తతో రాజకీయ వర్గాల్లో విషాదం నెలకొంది.

1948 ఆగస్టు 4న జన్మించిన శత్రుచర్ల విజయరామరాజు 1978లో తొలిసారిగా ఎమ్మెల్యేగా ఎన్నికై రాజకీయ ప్రస్థానాన్ని ప్రారంభించారు. తన రాజకీయ జీవితంలో మొత్తం ఐదుసార్లు ఎమ్మెల్యేగా, మూడుసార్లు ఎంపీగా ఎన్నికయ్యారు. రాష్ట్ర, జాతీయ రాజకీయాల్లో పలు కీలక బాధ్యతలు నిర్వహించారు.

దివంగత ముఖ్యమంత్రి వైఎస్ రాజశేఖరరెడ్డి మంత్రివర్గంలో అటవీశాఖ మంత్రిగా పనిచేశారు. అనంతరం కొణిజేటి రోశయ్య ముఖ్యమంత్రిగా ఉన్న సమయంలో రవాణాశాఖ మంత్రిగా బాధ్యతలు నిర్వహించారు. రెండు ప్రభుత్వాల్లోనూ మంత్రిగా పనిచేసి తన రాజకీయ అనుభవాన్ని చాటుకున్నారు.

2017లో తెలుగుదేశం పార్టీ తరఫున ఎమ్మెల్సీగా ఎన్నికయ్యారు. ఎమ్మెల్యేగా, ఎంపీగా, మంత్రిగా, ఎమ్మెల్సీగా వివిధ హోదాల్లో ప్రజాప్రతినిధిగా సేవలందించారు. ఆయన మరణంతో రాజకీయ రంగంలో ఒక సీనియర్ నాయకుడిని కోల్పోయినట్లయింది.

శత్రుచర్ల విజయరామరాజు మృతిపై పలువురు రాజకీయ ప్రముఖులు, నాయకులు సంతాపం వ్యక్తం చేస్తున్నారు. ఆయన కుటుంబ సభ్యులకు ప్రగాఢ సానుభూతి తెలియజేస్తున్నారు.