కొత్త ఏసీ బస్సుల్లోనూ మహిళలకు ఉచిత ప్రయాణం.. సీఎం చంద్రబాబు కీలక ప్రకటన
అన్నమయ్య జిల్లా / ఎన్ టుడే న్యూస్: ఆంధ్రప్రదేశ్‌లో ‘స్త్రీ శక్తి’ పథకం కింద మహిళలకు అందిస్తున్న ఉచిత బస్సు ప్రయాణంపై ముఖ్యమంత్రి చంద్రబాబు నాయుడు కీలక ప్రకటన చేశారు.
ప్రస్తుతం రాష్ట్రంలో పల్లె వెలుగు, ఎక్స్‌ప్రెస్, సిటీ ఆర్డినరీ బస్సుల్లో మహిళలకు ఉచిత ప్రయాణ సౌకర్యం అందుబాటులో ఉంది. త్వరలో కొత్త ఏసీ బస్సులను కొనుగోలు చేసి వాటిలోనూ మహిళలకు ఉచిత ప్రయాణ సౌకర్యాన్ని కల్పించనున్నట్లు ముఖ్యమంత్రి తెలిపారు.
మహిళల కోసం ప్రత్యేకంగా కొత్త ఏసీ బస్సులను కొనుగోలు చేసి డిపోలకు అందుబాటులోకి తీసుకువచ్చిన అనంతరం వాటిలో ఉచిత ప్రయాణ సేవలను అమలు చేయనున్నట్లు పేర్కొన్నారు.
అయితే సూపర్ లగ్జరీ, అంతర్రాష్ట్ర, తిరుమల సప్తగిరి బస్సులకు ‘స్త్రీ శక్తి’ పథకం వర్తించదని అధికారులు తెలిపారు.
మహిళలకు ప్రజా రవాణా సౌకర్యాన్ని మరింత విస్తరించే చర్యల్లో భాగంగా కొత్త ఏసీ బస్సుల్లోనూ ఉచిత ప్రయాణాన్ని అందించే అంశాన్ని ప్రభుత్వం ముందుకు తీసుకెళ్తున్నట్లు వెల్లడించింది.
