వీధి కుక్కల దాడిలో మేక పిల్లలు మృతి

ఆరెగూడెంలో ఘటన.. వీధి కుక్కల బెడదను అరికట్టాలని గ్రామస్తుల విజ్ఞప్తి

NTODAY NEWS: చిట్యాల 

నల్గొండ జిల్లా చిట్యాల మండలంలోని ఆరెగూడెం గ్రామంలో వీధి కుక్కలు దాడి చేయడంతో పది మేక పిల్లలు మృతి చెందాయి. ఈ ఘటన గురువారం చోటుచేసుకుంది. గ్రామానికి చెందిన ఆరూరి నరసింహ సత్తయ్యకు చెందిన మేకల దొడ్డిపై వీధి కుక్కలు ఒక్కసారిగా దాడి చేసి పది మేక పిల్లలను చంపాయి. ఈ ఘటనలో సుమారు రూ.60 వేల నుంచి రూ.70 వేల వరకు ఆర్థిక నష్టం వాటిల్లినట్లు బాధితుడు ఆవేదన వ్యక్తం చేశాడు. రెక్కల కష్టంతో మేకలను పెంచుకుంటూ జీవనం సాగిస్తున్న తనకు ఈ ఘటన తీరని నష్టాన్ని మిగిల్చిందని బాధితుడు వాపోయాడు. గ్రామంలో వీధి కుక్కల సంచారం పెరిగి ప్రజలు, పశువులు తీవ్ర ఇబ్బందులు ఎదుర్కొంటున్నారని గ్రామస్తులు ఆందోళన వ్యక్తం చేస్తున్నారు. సంబంధిత అధికారులు స్పందించి వీధి కుక్కల బెడదను నియంత్రించేందుకు తక్షణ చర్యలు చేపట్టాలని, బాధిత మేకల పెంపకందారుడికి ప్రభుత్వం నష్టపరిహారం అందించి ఆదుకోవాలని గ్రామస్తులు కోరుతున్నారు.