వరద బాధితులకు అండగా ప్రభుత్వం

వరద బాధితులను ఆదుకునేందుకు ముఖ్యమంత్రి చంద్రబాబు నాయుడు ఆర్థిక సాయం ప్రకటించారు. విపత్తు కారణంగా ఇబ్బందులు ఎదుర్కొంటున్న బాధిత కుటుంబాలకు తక్షణ ఉపశమనం కల్పించేలా పలు రకాల సహాయక చర్యలు చేపట్టనున్నట్లు వెల్లడించారు. ప్రభుత్వ సహాయక శిబిరాలకు వెళ్లిన ఒక్కొక్కరికి రూ.1,000 చొప్పున ఆర్థిక సాయం అందించనున్నట్లు తెలిపారు. వరద బాధిత కుటుంబాలకు నిత్యావసరాల కొరత లేకుండా ఉల్లి, చక్కెర, బంగాళాదుంపలు ఒక్కో కిలో చొప్పున ఉచితంగా పంపిణీ చేయనున్నారు. విపత్తులో ప్రాణాలు కోల్పోయిన వారి కుటుంబాలకు రూ.5 లక్షల పరిహారం అందించనున్నారు. ఇళ్లు పాక్షికంగా దెబ్బతిన్న బాధితులకు రూ.10 వేల చొప్పున ఆర్థిక సాయం ప్రకటించారు. అలాగే వరదల కారణంగా ద్విచక్ర వాహనాలు దెబ్బతిన్న వారికి రూ.3 వేలు, త్రిచక్ర వాహనాలు దెబ్బతిన్న వారికి రూ.10 వేల చొప్పున పరిహారం అందించనున్నట్లు ప్రకటించారు. వరదలతో ఆస్తులు, జీవనోపాధి కోల్పోయి ఇబ్బందులు పడుతున్న ప్రజలకు ప్రభుత్వం అండగా ఉంటుందని ఈ చర్యల ద్వారా స్పష్టం చేశారు.