డాక్టర్ హిమశేఖర్ స్కూల్లో విజయదశమి ఉత్సవాలు
ఆంధ్రప్రదేశ్
/
అనకాపల్లి
గవరపాలెం: విజయదశమి పర్వదినాన్ని పురస్కరించుకొని గవరపాలెంలోని డాక్టర్ హిమశేఖర్ స్కూల్లో దసరా ఉత్సవాలను ఘనంగా నిర్వహించారు. ఈ వేడుకలతో పాఠశాల ప్రాంగణం పండుగ వాతావరణాన్ని సంతరించుకుంది. విద్యార్థులు వివిధ దేవతామూర్తుల వేషధారణలతో ప్రత్యేక ఆకర్షణగా నిలిచారు.
ఈ సందర్భంగా పాఠశాల డైరెక్టర్ కె. సౌజన్య మాట్లాడుతూ దసరా పండుగ చెడుపై మంచి సాధించిన విజయానికి ప్రతీక అని తెలిపారు. విద్యార్థులు సత్యం, ధర్మం, ధైర్యం, క్రమశిక్షణ వంటి సద్గుణాలను అలవర్చుకోవాలని సూచించారు. దుర్గాదేవి మహిషాసురుడిపై సాధించిన విజయం ద్వారా ధర్మం, న్యాయం ఎల్లప్పుడూ గెలుస్తాయనే సందేశం అందుతుందని పేర్కొన్నారు.
పాఠశాల ప్రిన్సిపల్ పి. సురేష్ మాట్లాడుతూ భారతీయ సంస్కృతి, సంప్రదాయాలు, పండుగల విశిష్టతను చిన్ననాటి నుంచే విద్యార్థులకు తెలియజేయడం అవసరమన్నారు. ఇలాంటి కార్యక్రమాల ద్వారా విద్యార్థుల్లో సాంస్కృతిక విలువలు, ఆధ్యాత్మిక భావన, సృజనాత్మకత, ఆత్మవిశ్వాసం పెంపొందుతాయని తెలిపారు.
వేడుకల్లో భాగంగా విద్యార్థులు రంగురంగుల దుస్తులు, సంప్రదాయ అలంకరణలతో వివిధ దేవతామూర్తుల వేషధారణలో అలరించారు. పాఠశాలలో ఏర్పాటు చేసిన దేవతామూర్తుల ప్రతిమలు ఉత్సవాలకు మరింత శోభను చేకూర్చాయి. విద్యార్థుల వేషధారణలను తల్లిదండ్రులు, ఉపాధ్యాయులు ఆసక్తిగా తిలకించి అభినందించారు.
ఈ కార్యక్రమంలో వైస్ ప్రిన్సిపల్ బి. జగన్, ఇన్‌చార్జిలు భాను, స్వాతి, పీఈటీ ప్రేమ్, ఉపాధ్యాయులు ఇందిర, అనిత, లావణ్య, ప్రసన్న, వాణి, రూప, నాగలక్ష్మి, ఇతర ఉపాధ్యాయులు, విద్యార్థులు, తల్లిదండ్రులు పాల్గొన్నారు.
