దుర్గానగర్ కాలనీలో ఘనంగా గణేష్ నవరాత్రి సాంస్కృతిక వేడుకలు

బీరంగూడ సమీపంలోని కిష్టారెడ్డిపేట, దుర్గానగర్ కాలనీలో వినాయక చవితి నవరాత్రి ఉత్సవాలు అత్యంత వైభవంగా జరుగుతున్నాయి. ఉత్సవాల్లో భాగంగా గణనాథుని మండపం వద్ద ఏర్పాటు చేసిన ప్రత్యేక సాంస్కృతిక కార్యక్రమాలు స్థానికులను విశేషంగా అలరించాయి.

చిన్నారులు, స్థానిక యువత ప్రదర్శించిన భక్తి నృత్యాలు, గణపతి స్తోత్ర పఠనాలు, సాంస్కృతిక ప్రదర్శనలు కాలనీలో ఆధ్యాత్మిక ఉత్సాహాన్ని నింపాయి. పెద్ద సంఖ్యలో తరలివచ్చిన భక్తులు వినాయకుడిని దర్శించుకుని ప్రత్యేక పూజలు, హారతులు సమర్పించారు.

ఈ వేడుకలు దుర్గానగర్ కమిటీ ఆధ్వర్యంలో అత్యంత ఘనంగా జరిగాయి. ఈ సందర్భంగా కమిటీ ప్రతినిధులు మాట్లాడుతూ... కాలనీవాసులంతా ఒక్కటై గణేష్ నవరాత్రులను ఇంత వైభవంగా జరుపుకోవడం ఎంతో సంతోషదాయకమని, ఆ విఘ్నేశ్వరుని ఆశీస్సులతో కాలనీ ప్రజల విఘ్నాలన్నీ తొలగి సుఖసంతోషాలతో ఉండాలని ఆకాంక్షించారు.

అనంతరం భక్తులకు తీర్థప్రసాదాల వితరణ చేపట్టారు. ఈ సంబరాల్లో కాలనీ మహిళలు, యువకులు, పెద్దలు పెద్ద సంఖ్యలో పాల్గొన్నారు.