ట్రంప్‌కు దీపావళి కానుకగా హనుమాన్ చాలీసా

అమెరికా అధ్యక్షుడికి భారత వ్యాపారవేత్త విశాల్ గొండల్ ప్రత్యేక బహుమతి

వాషింగ్టన్ (ఎన్ టుడే న్యూస్): అమెరికా అధ్యక్షుడు డొనాల్డ్ ట్రంప్‌కు భారత వ్యాపారవేత్త విశాల్ గొండల్ ప్రత్యేక బహుమతిని అందజేశారు. దీపావళి వేడుకల సందర్భంగా తులసీదాస్ రచించిన హనుమాన్ చాలీసా ప్రతిని ట్రంప్‌కు బహూకరించారు.

ఈ సందర్భంగా విశాల్ గొండల్ స్పందిస్తూ.. అమెరికా అధ్యక్షుడు ట్రంప్‌తో కలిసి దీపావళి వేడుకల్లో పాల్గొనడం తనకు ఎంతో గౌరవంగా ఉందని తెలిపారు. కోట్లాది మంది భక్తులు ధైర్యం, బలం, శక్తి కోసం పఠించే హనుమాన్ చాలీసాను బహుమతిగా అందించడం గర్వంగా ఉందన్నారు.

భారత్, అమెరికా దేశాల మధ్య స్నేహ సంబంధాలు మరింత బలోపేతం కావాలని, ప్రపంచవ్యాప్తంగా చీకటిపై వెలుగు విజయం సాధించాలని భగవంతుడిని ప్రార్థించినట్లు పేర్కొన్నారు.

దీపావళి వేడుకల సందర్భంగా భారతీయ ఆధ్యాత్మిక సంప్రదాయాన్ని ప్రతిబింబించేలా హనుమాన్ చాలీసాను బహూకరించడం ప్రత్యేక ఆకర్షణగా నిలిచింది.