వీరులపాడు మండలంలో భారీ వర్షం.. రహదారిపై గుంతలతో వాహనదారుల అవస్థలు

ఈదురుగాలులతో ఎడతెరిపి లేని వర్షం.. వీరులపాడు–కంచికచర్ల రహదారిపై ప్రమాదాల భయం

వీరులపాడు, నవంబర్ 3 (ఎన్ టుడే న్యూస్): వీరులపాడు మండలవ్యాప్తంగా మంగళవారం అర్ధరాత్రి నుంచి ఈదురుగాలులతో కూడిన భారీ వర్షం కురుస్తోంది. ఎడతెరిపి లేకుండా కురుస్తున్న వర్షంతో జనజీవనం అస్తవ్యస్తంగా మారింది. పలు ప్రాంతాల్లో రహదారులపై వర్షపు నీరు నిలిచిపోవడంతో ప్రజలు ఇబ్బందులు ఎదుర్కొంటున్నారు.

గుంతల్లో నిలిచిన వర్షపు నీరు

వీరులపాడు నుంచి కంచికచర్లకు వెళ్లే ప్రధాన రహదారిపై పెద్దపెద్ద గుంతలు ఏర్పడ్డాయి. ప్రస్తుతం కురుస్తున్న వర్షంతో ఆ గుంతల్లో నీరు చేరడంతో అవి కనిపించక వాహనదారులు ప్రమాదాలకు గురయ్యే పరిస్థితి నెలకొంది. ముఖ్యంగా ద్విచక్ర వాహనదారులు రాకపోకలు సాగించేందుకు ఇబ్బందులు పడుతున్నారు.

అధికారులు స్పందించి మరమ్మతులు చేపట్టాలి

ప్రధాన రహదారిపై గుంతల కారణంగా ఎప్పుడు ప్రమాదం జరుగుతుందోనని స్థానికులు ఆందోళన వ్యక్తం చేస్తున్నారు. సంబంధిత అధికారులు, ప్రజాప్రతినిధులు వెంటనే స్పందించి వీరులపాడు–కంచికచర్ల రహదారికి మరమ్మతులు చేపట్టాలని గ్రామస్థులు, వాహనదారులు కోరుతున్నారు. వర్షాలు కొనసాగుతున్న నేపథ్యంలో తాత్కాలికంగా అయినా గుంతలను పూడ్చి ప్రమాదాలను నివారించాలని విజ్ఞప్తి చేస్తున్నారు.\