ఎస్సారెస్పీ నీటిపైకి తేలిన కుస్తాపురం ఆలయ శిఖరం

నీటిమట్టం తగ్గడంతో వెలుగుచూసిన అరుదైన దృశ్యం.. తెప్పలపై వెళ్లి స్వామివారిని దర్శించుకున్న మత్స్యకారులు

డోంకేశ్వర్, నవంబర్ 3 (ఎన్ టుడే న్యూస్):

శ్రీరాంసాగర్ ప్రాజెక్టు (ఎస్సారెస్పీ) ముంపు ప్రాంతంలో దశాబ్దాలుగా నీటిలోనే ఉండిపోయిన కుస్తాపురం రామలింగేశ్వర స్వామి ఆలయ శిఖరం తిరిగి వెలుగులోకి వచ్చింది. నిజామాబాద్ జిల్లా డోంకేశ్వర్ మండలం చిన్యాయానం బ్యాక్‌వాటర్ ప్రాంతంలో నీటిమట్టం తగ్గడంతో ఆలయ శిఖరం నీటిపైకి కనిపిస్తోంది. ఈ అరుదైన దృశ్యం స్థానికుల్లో ఆసక్తిని కలిగిస్తోంది.

త్రేతాయుగంతో ముడిపడిన స్థల పురాణం

స్థల పురాణం ప్రకారం.. త్రేతాయుగంలో శ్రీరాముడు సీతాదేవితో కలిసి ఈ ప్రాంతంలో సంచరిస్తూ, స్వయంగా ఇసుకతో సైకత లింగాన్ని ప్రతిష్ఠించినట్లు చెబుతారు. ఈ నేపథ్యంలో ఇక్కడి రామలింగేశ్వర స్వామి ఆలయానికి ప్రత్యేక ఆధ్యాత్మిక ప్రాధాన్యం ఉందని స్థానికులు విశ్వసిస్తారు.

2019లో పూర్తిగా బయటపడిన ఆలయం

శ్రీరాంసాగర్ ప్రాజెక్టు నిర్మాణం కారణంగా కుస్తాపురం గ్రామంతో పాటు ఈ ఆలయం కూడా ముంపునకు గురైంది. చివరిసారిగా 2019లో నీటిమట్టం తగ్గడంతో ఆలయం పూర్తిగా బయటపడినట్లు స్థానికులు తెలిపారు. ప్రస్తుతం ప్రాజెక్టులో నీరు తగ్గడంతో ఆలయ శిఖరం భాగం మాత్రమే కనిపిస్తోంది.

తెప్పలపై వెళ్లి ప్రత్యేక పూజలు

ఆలయ శిఖరం నీటిపై కనిపించడంతో అన్నారం, సిర్పూర్ గ్రామాలకు చెందిన మత్స్యకారులు తెప్పలపై సుమారు రెండు కిలోమీటర్లు ప్రయాణించి అక్కడికి చేరుకున్నారు. ప్రశాంత్, నరేష్, సాయి, సంజయ్‌లతో పాటు పలువురు మత్స్యకారులు ఆలయ శిఖరాన్ని భక్తిశ్రద్ధలతో దర్శించుకుని ప్రత్యేక పూజలు నిర్వహించారు.

పూర్తి ఆలయం బయటపడే అవకాశం

రాబోయే రోజుల్లో ఎస్సారెస్పీ నీటిమట్టం మరింత తగ్గితే ఆలయం పూర్తిగా బయటపడే అవకాశం ఉందని స్థానికులు భావిస్తున్నారు. దశాబ్దాలుగా నీటిలో ఉన్న ఆలయ శిఖరం కనిపించడంతో భక్తులు, స్థానికులు ఈ ప్రాంతం గురించి ఆసక్తిగా చర్చించుకుంటున్నారు.