ఎయిరిండియా విమానంలో హైజాక్ హెచ్చరిక..

వాష్‌రూం అద్దంపై గుర్తుతెలియని వ్యక్తి రాతలు

కోల్‌కతా: కోల్‌కతా నుంచి ముంబయికి ఉదయం బయలుదేరాల్సిన ఎయిరిండియా విమానంలో హైజాక్ హెచ్చరిక కలకలం రేపింది. విమానం వాష్‌రూంలోని అద్దంపై గుర్తుతెలియని వ్యక్తి విమానాన్ని హైజాక్ చేసే అవకాశం ఉందనే అర్థం వచ్చేలా రాతలు రాసి ఉంచినట్లు గుర్తించారు.

విమానం టేకాఫ్ కావడానికి ముందు పైలెట్లు ఈ విషయాన్ని గమనించారు. వెంటనే ఎయిర్ ట్రాఫిక్ కంట్రోల్ (ఏటీసీ) అధికారులకు సమాచారం అందించారు. దీంతో విమాన భద్రతకు సంబంధించిన అంశంగా ఈ హెచ్చరికను పరిగణనలోకి తీసుకున్నారు.

విమానాశ్రయ అధికారులు వెంటనే భద్రతా ప్రోటోకాల్స్‌ను అమల్లోకి తెచ్చారు. విమానాన్ని ప్రత్యేకంగా కేటాయించిన ఐసోలేషన్ బేకు తరలించి, అందులోని ప్రయాణికులను కిందకు దించారు. విమానంలో బాంబు స్క్వాడ్, సీఐఎస్ఎఫ్, ఇతర భద్రతా సిబ్బంది తనిఖీలు చేపట్టారు. విమానంలో ఎలాంటి అనుమానాస్పద వస్తువులు ఉన్నాయా అనే కోణంలో క్షుణ్ణంగా పరిశీలించారు.

విమానాశ్రయ డైరెక్టర్ విక్రమ్ సింగ్ వెల్లడించిన వివరాల ప్రకారం, విమానం ఉదయం 10.20 గంటలకు బయలుదేరాల్సి ఉంది. వాష్‌రూంలో లభించిన హెచ్చరికలో ఉదయం 11.10 గంటలకు విమానాన్ని హైజాక్ చేస్తామని పేర్కొన్నట్లు అధికారులు తెలిపారు. ఈ హెచ్చరిక రాసిన వ్యక్తిని గుర్తించేందుకు పోలీసులు, భద్రతా సంస్థలు దర్యాప్తు చేపట్టాయి. విమానాశ్రయంలోని సీసీటీవీ ఫుటేజీని కూడా పరిశీలిస్తున్నట్లు సమాచారం.