నకిలీ నంబర్ ప్లేట్లపై హైదరాబాద్ ట్రాఫిక్ పోలీసుల ప్రత్యేక డ్రైవ్

నిబంధనలు ఉల్లంఘిస్తే క్రిమినల్ కేసులు.. వాహనాల సీజ్

(ఎన్ టుడే న్యూస్):

నకిలీ, ట్యాంపరింగ్ చేసిన, అనధికార నంబర్ ప్లేట్ల వినియోగంపై హైదరాబాద్ ట్రాఫిక్ పోలీసులు ప్రత్యేక తనిఖీలు చేపట్టారు. మోటారు వాహనాల చట్ట నిబంధనలను ఉల్లంఘిస్తూ వాహనాల నంబర్ ప్లేట్లను మార్చడం, అంకెలను తొలగించడం, గుర్తించలేని విధంగా మార్పులు చేయడం వంటి చర్యలకు పాల్పడుతున్న వారిపై కఠిన చర్యలు తీసుకుంటున్నారు.

ఈ వారంలో బంజారాహిల్స్, అంబర్‌పేట్, హనుమకొండ, కొండాపూర్, చౌటుప్పల్ పోలీస్ స్టేషన్ల పరిధిలో మొత్తం ఆరు క్రిమినల్ కేసులు నమోదు చేసినట్లు పోలీసులు వెల్లడించారు. చౌటుప్పల్ పరిధిలోనే రెండు కేసులు నమోదయ్యాయి. తనిఖీల్లో నిబంధనలకు విరుద్ధంగా నంబర్ ప్లేట్లు అమర్చిన పలు వాహనాలను గుర్తించి సీజ్ చేసినట్లు తెలిపారు.

ప్రభుత్వం నిర్దేశించిన ప్రమాణాలకు అనుగుణంగా, అధీకృత సంస్థలు జారీ చేసిన హై సెక్యూరిటీ రిజిస్ట్రేషన్ ప్లేట్లు (HSRP) మాత్రమే వాహనాలకు చట్టబద్ధమైనవని పోలీసులు స్పష్టం చేశారు. నంబర్ ప్లేట్లపై అంకెలను మార్చడం, తొలగించడం, వేరే అక్షరాలు లేదా గుర్తులు చేర్చడం, తాత్కాలిక స్టిక్కర్లు ఉపయోగించి అసలు రిజిస్ట్రేషన్ నంబర్‌ను కప్పిపుచ్చడం చట్టవిరుద్ధమని హెచ్చరించారు.

ఇలాంటి ఉల్లంఘనలకు పాల్పడితే క్రిమినల్ కేసులు నమోదు చేయడంతో పాటు వాహనాలను సీజ్ చేసే చర్యలు తప్పవని పోలీసులు స్పష్టం చేశారు. వాహనదారులు నిబంధనలకు అనుగుణంగా నంబర్ ప్లేట్లు ఏర్పాటు చేసుకోవాలని సూచించారు. నగరవ్యాప్తంగా ప్రత్యేక తనిఖీలు కొనసాగుతాయని వెల్లడించారు.