వరంగల్ అండర్ బ్రిడ్జి వద్ద వినూత్న నిరసన
పైప్‌లైన్ లీకేజీ, డ్రైనేజీ సమస్యలను పరిష్కరించాలని డిమాండ్
వరంగల్, అక్టోబర్ 1: వరంగల్ అండర్ బ్రిడ్జి కింద నెలకొన్న మంచినీటి పైప్‌లైన్ లీకేజీ, డ్రైనేజీ నీరు, చేపలు కడిగిన నీటితో ఏర్పడుతున్న బురద, దుర్వాసన సమస్యలను పరిష్కరించాలని డిమాండ్ చేస్తూ కాంటెస్టెడ్ కార్పొరేటర్ అభ్యర్థి మేరుగు అశోక్ ఆధ్వర్యంలో వినూత్న నిరసన చేపట్టారు.
అండర్ బ్రిడ్జి పరిసరాల్లో నెలలుగా మంచినీటి పైప్‌లైన్ లీకేజీ కొనసాగుతున్నప్పటికీ అధికారులు సమస్యను పట్టించుకోవడం లేదని మేరుగు అశోక్ ఆరోపించారు. పైప్‌లైన్ లీకేజీతో పాటు డ్రైనేజీ నీరు, చేపలు కడిగిన నీరు రోడ్డుపై చేరడంతో బురద, దుర్వాసన ఏర్పడి ప్రజలు ఇబ్బందులు ఎదుర్కొంటున్నారని తెలిపారు.
ఈ సమస్యపై అధికారుల దృష్టిని ఆకర్షించేందుకు అండర్ బ్రిడ్జి వద్ద గులాబీ పూలు చల్లి వినూత్న రీతిలో నిరసన చేపట్టినట్లు పేర్కొన్నారు. ప్రజలకు ఇబ్బందులు కలగకుండా సంబంధిత అధికారులు వెంటనే స్పందించి మంచినీటి పైప్‌లైన్ లీకేజీ, డ్రైనేజీ సమస్యలను పరిష్కరించాలని డిమాండ్ చేశారు.
