మున్సిపల్ పదవుల్లో 40.1 శాతం వాటా కోరిన జనసేన.. 2,091 స్థానాల ప్రతిపాదన
ఆంధ్రప్రదేశ్‌లో మున్సిపాలిటీలు, నగర పంచాయతీలు, మున్సిపల్ కార్పొరేషన్లలో కూటమి పొత్తులో భాగంగా తమకు 40.1 శాతం వాటా కేటాయించాలని జనసేన ప్రతిపాదించినట్లు సమాచారం. ఈ మేరకు మొత్తం 2,091 పదవులతో కూడిన ప్రతిపాదన జాబితాను జనసేన సిద్ధం చేసినట్లు తెలుస్తోంది.
ప్రతిపాదనలో భాగంగా 6 మేయర్ స్థానాలు, 6 డిప్యూటీ మేయర్ పదవులు, 38 మున్సిపల్ చైర్‌పర్సన్ స్థానాలు, 41 వైస్ చైర్‌పర్సన్ పదవులు ఇవ్వాలని జనసేన కోరినట్లు సమాచారం. అలాగే నగర పంచాయతీల్లో 6 చైర్‌పర్సన్, 6 వైస్ చైర్‌పర్సన్ స్థానాలను తమకు కేటాయించాలని ప్రతిపాదించినట్లు తెలుస్తోంది.
అయితే కూటమి పార్టీల మధ్య సీట్ల సర్దుబాటు, పదవుల పంపకాలపై చర్చలు పూర్తికాకముందే జనసేన ప్రతిపాదన జాబితా విడుదల కావడంపై టీడీపీ వర్గాల్లో చర్చ జరుగుతోంది. అధికారికంగా నిర్ణయం తీసుకోకముందే జాబితా ఎలా విడుదల చేస్తారని పలువురు టీడీపీ నేతలు ప్రశ్నిస్తున్నట్లు సమాచారం.
మున్సిపల్ ఎన్నికల నేపథ్యంలో కూటమి భాగస్వామ్య పార్టీల మధ్య పదవుల పంపకం అంశం ప్రస్తుతం రాజకీయ వర్గాల్లో ఆసక్తిని రేకెత్తిస్తోంది.
