జనసేనలోకి వంగవీటి రాధాకృష్ణ.. విజయవాడ మేయర్ రేసుపై ఆసక్తి!
పవన్ సమక్షంలో జనసేన కండువా కప్పుకున్న వంగవీటి.. స్థానిక రాజకీయాల్లో కొత్త చర్చలు
మంగళగిరి: రాజకీయంగా కీలక పరిణామం చోటుచేసుకుంది. మాజీ ఎమ్మెల్యే వంగవీటి రాధాకృష్ణ జనసేన పార్టీలో చేరారు. జనసేన అధినేత పవన్ కల్యాణ్ సమక్షంలో ఆయన పార్టీ కండువా కప్పుకున్నారు. రాధాకృష్ణతో పాటు తిరుపతికి చెందిన ప్రణీత్ ప్రమోద్ కూడా జనసేనలో చేరారు.
వంగవీటి రాధాకృష్ణ జనసేనలో చేరికతో విజయవాడ రాజకీయ వర్గాల్లో చర్చ మొదలైంది. రానున్న స్థానిక సంస్థల ఎన్నికల నేపథ్యంలో విజయవాడ నగర పాలక సంస్థ మేయర్ అభ్యర్థిత్వంపై ఆయన పేరు పరిశీలనలో ఉన్నట్లు ప్రచారం సాగుతోంది. మరోవైపు తిరుపతి మేయర్ రేసులో ప్రణీత్ ప్రమోద్ పేరు కూడా వినిపిస్తోంది.
విజయవాడ నగర రాజకీయాల్లో వంగవీటి కుటుంబానికి ఉన్న ప్రత్యేక గుర్తింపు నేపథ్యంలో ఆయన చేరికపై రాజకీయ వర్గాలు ఆసక్తిగా గమనిస్తున్నాయి. జనసేన బలోపేతానికి ఈ చేరికలు ఎంతవరకు ఉపయోగపడతాయన్న అంశంపై చర్చ జరుగుతోంది.
స్థానిక ఎన్నికల సమీకరణాలు వేగంగా మారుతున్న వేళ జనసేనలోకి ప్రముఖ నేతల చేరికలు రాజకీయ వాతావరణాన్ని మరింత వేడెక్కిస్తున్నాయి. అయితే మేయర్ అభ్యర్థులపై తుది నిర్ణయం పార్టీ అధిష్టానం ప్రకటించాల్సి ఉంది.
