విజయవాడలో విజయసాయిరెడ్డి కొత్త పార్టీపై కేఏ పాల్ విమర్శలు

అది పరివర్తన పార్టీ కాదు.. అపరివర్తన అవినీతి పార్టీ అంటూ ఎద్దేవా విజయవాడ: మాజీ ఎంపీ విజయసాయిరెడ్డి కొత్తగా స్థాపించిన రాజకీయ పార్టీపై ప్రజాశాంతి పార్టీ అధ్యక్షుడు కేఏ పాల్ తీవ్ర విమర్శలు చేశారు. విజయసాయిరెడ్డి ఏర్పాటు చేసిన పార్టీ పరివర్తన పార్టీ కాదని, అపరివర్తన అవినీతి పార్టీ అని ఎద్దేవా చేశారు. దాచుకున్న నల్లధనాన్ని కాపాడుకునేందుకే ఆయన మళ్లీ రాజకీయాల్లోకి వచ్చి కొత్త పార్టీని స్థాపించారని ఆరోపించారు. గతంలో రాజకీయాల నుంచి తప్పుకుంటానని ప్రకటించిన విజయసాయిరెడ్డి ఇప్పుడు అక్రమంగా సంపాదించిన ఆస్తులను కాపాడుకునేందుకు కొత్త వ్యూహంతో ముందుకు వచ్చారని కేఏ పాల్ విమర్శించారు. శ్రీకాకుళం నుంచి హైదరాబాద్ వరకు విస్తరించి ఉన్నాయని పేర్కొన్న ఆయన ఆస్తులను, అక్రమంగా సంపాదించిన సొమ్మును వెంటనే ప్రభుత్వానికి అప్పగించాలని డిమాండ్ చేశారు. విజయసాయిరెడ్డికి సంబంధించిన ఆస్తులపై కేంద్ర దర్యాప్తు సంస్థ సీబీఐ ఎందుకు విచారణ జరపడం లేదని ప్రశ్నించారు. వైసీపీ అధినేత జగన్ ఓటు బ్యాంకును దెబ్బతీయడంతో పాటు ఇతర రాజకీయ శక్తులకు ప్రయోజనం చేకూర్చేందుకే విజయసాయిరెడ్డి కొత్త పార్టీని ఏర్పాటు చేశారని ఆరోపించారు. రాష్ట్ర రాజకీయాల్లో దశాబ్దాలుగా ఒకే వర్గం ఆధిపత్యం కొనసాగుతోందని కేఏ పాల్ అన్నారు. రాష్ట్ర జనాభాలో 60 శాతానికి పైగా ఉన్న బీసీలకు, 27 శాతం ఉన్న కాపులకు రాజ్యాధికారం ఎప్పుడు దక్కుతుందని ప్రశ్నించారు. రాష్ట్ర రాజకీయాల్లో అన్ని వర్గాలకు సముచిత ప్రాధాన్యం కల్పించాలని ఈ సందర్భంగా ఆయన డిమాండ్ చేశారు

.