కనిగిరి సీడీపీవో సరోజినీ సస్పెండ్
కనిగిరి: మార్కాపురం జిల్లా కనిగిరి ఐసీడీఎస్ పరిధిలో అంగన్వాడీ కేంద్రాల నిర్వహణపై వచ్చిన ఆరోపణల నేపథ్యంలో సీడీపీవో పి. సరోజినీపై ఉన్నతాధికారులు చర్యలు తీసుకున్నారు. విధుల నిర్వహణలో నిర్లక్ష్యంగా వ్యవహరించారనే ఆరోపణలపై ఆమెను సస్పెండ్ చేసినట్లు అధికారులు తెలిపారు.
కనిగిరి ఐసీడీఎస్ పరిధిలోని అంగన్వాడీ కేంద్రాల నిర్వహణపై కొంతకాలంగా విమర్శలు, ఫిర్యాదులు వస్తున్న నేపథ్యంలో అధికారులు పరిశీలన చేపట్టినట్లు సమాచారం. ఇప్పటికే కనిగిరి పరిధిలో పనిచేస్తున్న ఓ సూపర్వైజర్ను కూడా సస్పెండ్ చేసినట్లు అధికారులు తెలిపారు.
అదేవిధంగా కనిగిరి పట్టణ పరిధిలో ఓ అంగన్వాడీ కార్యకర్త, హెల్పర్ను విధుల నుంచి తొలగిస్తూ సీడీపీవో గతంలో ఆదేశాలు జారీ చేసినట్లు సమాచారం.
ఐసీడీఎస్ కేంద్రాల నిర్వహణలో పర్యవేక్షణ లోపాలు, విధి నిర్వహణలో నిర్లక్ష్యం కారణంగా సంబంధిత వ్యవహారాలపై ఆరోపణలు వచ్చాయని, ఈ నేపథ్యంలో సీడీపీవో సరోజినీపై సస్పెన్షన్ చర్యలు తీసుకున్నట్లు అధికారులు వెల్లడించారు.
అంగన్వాడీ కేంద్రాల్లో చిన్నారులు, గర్భిణులు, బాలింతలకు అందుతున్న సేవలు, పౌష్టికాహారం పంపిణీ, కేంద్రాల నిర్వహణ తదితర అంశాలపై అధికారులు మరింతగా దృష్టి సారించాల్సిన అవసరం ఉందని స్థానికులు కోరుతున్నారు.
