హైదరాబాద్‌లో క్రాకర్స్ షాపుల లైసెన్స్ ఫీజు 10 శాతం పెంపు

రిటైలర్లకు రూ.13,310.. హోల్‌సేలర్లకు రూ.79,860గా నిర్ణయం

హైదరాబాద్ (ఎన్ టుడే న్యూస్): దీపావళి పండుగను పురస్కరించుకుని 2026–27 ఆర్థిక సంవత్సరానికి హైదరాబాద్‌లో తాత్కాలిక క్రాకర్స్ షాపుల ట్రేడ్ లైసెన్స్ ఫీజులను గ్రేటర్ హైదరాబాద్ మున్సిపల్ కార్పొరేషన్ (GHMC) పెంచింది. గత ఏడాదితో పోలిస్తే ఈసారి 10 శాతం పెంపు అమలు చేయనుంది. ఈ మేరకు రిటైల్, హోల్‌సేల్ వ్యాపారులకు వేర్వేరు ఫీజులను నిర్ణయించింది.

రిటైల్, హోల్‌సేల్ షాపులకు వేర్వేరు ఫీజులు

కొత్త నిర్ణయం ప్రకారం తాత్కాలిక క్రాకర్స్ రిటైల్ షాపులకు రూ.13,310, హోల్‌సేల్ షాపులకు రూ.79,860 లైసెన్స్ ఫీజుగా చెల్లించాల్సి ఉంటుంది. దీపావళి సందర్భంగా బాణసంచా విక్రయాలు నిర్వహించాలనుకునే వ్యాపారులు ముందుగా నిర్ణీత విధానంలో తాత్కాలిక ట్రేడ్ ఐడెంటిఫికేషన్ నంబర్ (TIN) పొందాలని GHMC సూచించింది.

ఆన్‌లైన్‌లో దరఖాస్తు.. పత్రాల సమర్పణ

క్రాకర్స్ షాపుల నిర్వాహకులు GHMC అధికారిక వెబ్‌సైట్, మీ సేవ కేంద్రాలు లేదా సిటిజన్ సర్వీస్ సెంటర్ల ద్వారా తాత్కాలిక TIN కోసం దరఖాస్తు చేసుకోవచ్చు. దరఖాస్తు సమయంలో ఆధార్ కార్డు, పాన్ కార్డు వంటి గుర్తింపు పత్రాలను సమర్పించాలి. నిర్ణయించిన ఫీజును డిమాండ్ డ్రాఫ్ట్ (DD), డెబిట్ కార్డు, క్రెడిట్ కార్డు లేదా నెట్ బ్యాంకింగ్ ద్వారా చెల్లించే అవకాశం కల్పించారు.

అగ్నిమాపక భద్రతకు ప్రాధాన్యం

బాణసంచా షాపుల వద్ద అగ్నిప్రమాదాల నివారణకు అవసరమైన ఏర్పాట్లు తప్పనిసరిగా చేయాలని GHMC స్పష్టం చేసింది. ప్రతి షాపులో అగ్నిమాపక పరికరాలను ఏర్పాటు చేయడంతో పాటు అవి ఎప్పుడూ పనిచేసే స్థితిలో ఉండేలా చూసుకోవాలి. అత్యవసర పరిస్థితులు ఎదురైనప్పుడు వెంటనే స్పందించగల నైపుణ్యం కలిగిన సిబ్బందిని అందుబాటులో ఉంచాలి. షాపుల పరిసరాల్లో పరిశుభ్రతను పాటిస్తూ భద్రతా ప్రమాణాలను తప్పనిసరిగా అమలు చేయాలి.

ఫీజు చెల్లిస్తేనే అనుమతి లభించినట్లు కాదు

కేవలం ట్రేడ్ లైసెన్స్ ఫీజు చెల్లించినంత మాత్రాన క్రాకర్స్ షాపు నిర్వహణకు పూర్తి అనుమతి లభించినట్లు కాదని GHMC స్పష్టం చేసింది. సంబంధిత శాఖల నుంచి అవసరమైన అనుమతులు, నిబంధనల అమలు తప్పనిసరి. షాపుల వద్ద ప్రమాదాలు చోటుచేసుకుంటే నిర్వాహకులే బాధ్యత వహించాల్సి ఉంటుందని హెచ్చరించింది.

అలాగే సిరీస్ క్రాకర్స్ (లారీస్) తయారీ, విక్రయాలు, వినియోగంపై నిషేధం అమల్లో ఉంటుందని పేర్కొంది. నిబంధనలకు విరుద్ధంగా వ్యవహరించే షాపుల తాత్కాలిక ట్రేడ్ లైసెన్స్‌ను రద్దు చేయడంతో పాటు చట్టపరమైన చర్యలు తీసుకోనున్నట్లు తెలిపింది.

ఆకస్మిక తనిఖీలకు ప్రత్యేక బృందాలు

క్రాకర్స్ షాపుల్లో నిబంధనలు అమలవుతున్నాయా లేదా అనే విషయాన్ని పర్యవేక్షించేందుకు డిప్యూటీ కమిషనర్ల ఆధ్వర్యంలో ప్రత్యేక బృందాలను ఏర్పాటు చేయనున్నారు. ఈ బృందాలు షాపుల వద్ద ఫీజు చెల్లింపులు, అగ్నిమాపక భద్రతా ఏర్పాట్లు, పరిశుభ్రత తదితర అంశాలపై ఆకస్మిక తనిఖీలు నిర్వహించనున్నాయి.

దీపావళి సమయంలో ఎలాంటి అగ్నిప్రమాదాలు, అవాంఛనీయ ఘటనలు చోటుచేసుకోకుండా వ్యాపారులు నిబంధనలను పాటించాలని GHMC సూచించింది.