మైనర్‌పై లైంగిక దాడి కేసులో నిందితుడికి జీవిత ఖైదు బాధితురాలికి రూ.50 వేల పరిహారం.. రూ.4 వేల జరిమానా విధించిన ప్రత్యేక పోక్సో కోర్టు
హైదరాబాద్: మైనర్ బాలికపై లైంగిక దాడికి పాల్పడిన కేసులో నిందితుడికి రంగారెడ్డి జిల్లా ప్రత్యేక పోక్సో కోర్టు జీవిత ఖైదు విధించింది. హయత్‌నగర్ పోలీస్ స్టేషన్ పరిధిలో నమోదైన ఈ కేసును విచారించిన ఎల్‌బీనగర్‌లోని ప్రత్యేక పోక్సో కోర్టు నిందితుడిని దోషిగా నిర్ధారిస్తూ శిక్ష ఖరారు చేసింది. జీవిత ఖైదుతో పాటు రూ.4,000 జరిమానా విధించింది. అంతేకాకుండా బాధితురాలికి రూ.50,000 పరిహారం అందించాలని న్యాయస్థానం ఆదేశించింది. బాలికలపై లైంగిక నేరాలకు పాల్పడే వారిపై చట్టప్రకారం కఠిన చర్యలు తీసుకోవడంలో భాగంగా ఈ తీర్పు వెలువడింది. చిన్నారుల భద్రతకు ప్రాధాన్యతనిస్తూ, లైంగిక నేరాల బాధితులకు న్యాయం జరిగేలా పోలీసులు కృషి చేస్తున్నారని మల్కాజిగిరి పోలీసులు వెల్లడించారు. మహిళలు, చిన్నారుల రక్షణ విషయంలో ఎలాంటి నిర్లక్ష్యానికి తావులేకుండా కేసుల దర్యాప్తు, న్యాయపరమైన చర్యలను పకడ్బందీగా చేపడుతున్నట్లు తెలిపారు.
