ఘనంగా కామేపల్లిలో పోలేరమ్మ అమ్మవారి నవరాత్రి ఉత్సవాలు

బాల త్రిపుర సుందరి అలంకారంలో దర్శనమిచ్చిన అమ్మవారు.. రెండు తెలుగు రాష్ట్రాల నుంచి తరలివచ్చిన భక్తులు

కామేపల్లి, ప్రకాశం జిల్లా: జరుగుమల్లి మండలం కామేపల్లిలోని పోలేరమ్మ అమ్మవారి ఆలయంలో దసరా నవరాత్రి ఉత్సవాలు ఘనంగా నిర్వహిస్తున్నారు. ఉత్సవాల్లో భాగంగా ఆదివారం తెల్లవారుజాము నుంచే బాల త్రిపుర సుందరి దేవి అలంకారంలో ఉన్న అమ్మవారిని దర్శించుకునేందుకు రెండు తెలుగు రాష్ట్రాల నుంచి భక్తులు పెద్ద సంఖ్యలో తరలివచ్చారు.

భక్తులకు ఎలాంటి అసౌకర్యం కలగకుండా ఆలయ ఈవో బైరాగి చౌదరి, చైర్మన్ పోటు పెదబాబు ఏర్పాట్లు చేశారు. అమ్మవారి దర్శనంతో పాటు భక్తుల కోసం ఉచిత అన్నదాన కార్యక్రమాన్ని కూడా నిర్వహించారు. భక్తులు అన్నదానంలో పాల్గొని తీర్థప్రసాదాలు స్వీకరించాలని ఈవో కోరారు.

ఆలయ అర్చకుడు శ్రీనివాస వర్మ అమ్మవారికి ప్రత్యేక అలంకరణ చేసి పూజా కార్యక్రమాలు నిర్వహించారు. నవరాత్రి ఉత్సవాల సందర్భంగా ఆలయానికి భక్తుల రాక కొనసాగుతోంది.