పెనుగొలను హైస్కూల్లో రూ.11 లక్షలతో నిర్మించిన నూతన భోజనశాల ప్రారంభం

 గంపలగూడెం: విద్యార్థులకు మెరుగైన భోజన సదుపాయం కల్పించాలనే లక్ష్యంతో పూర్వ విద్యార్థుల సంఘం ఆధ్వర్యంలో రూ.11 లక్షల వ్యయంతో నిర్మించిన నూతన భోజనశాలను శనివారం ప్రారంభించారు. ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలోని కోట మార్కండేయ జిల్లా పరిషత్ ఉన్నత పాఠశాల ప్రాంగణంలో నిర్మించిన ఈ భోజనశాలను మండల విద్యాధికారి పీవీడీఎల్ నరసింహారావు రిబ్బన్ కట్ చేసి ప్రారంభించారు. పాఠశాలలో చదువుతున్న విద్యార్థులు సౌకర్యవంతంగా కూర్చుని భోజనం చేసేందుకు పూర్వ విద్యార్థుల సంఘం ఈ భోజనశాలను నిర్మించడం అభినందనీయమని పలువురు పేర్కొన్నారు. పాఠశాలతో తమకున్న అనుబంధాన్ని గుర్తుచేసుకుంటూ పూర్వ విద్యార్థులు విద్యార్థుల సంక్షేమం కోసం ముందుకు రావడం ఆదర్శనీయమని తెలిపారు. ఈ కార్యక్రమంలో పూర్వ విద్యార్థుల సంఘం అధ్యక్షుడు ఊటుకూరు వెంకట రామారావు, పాఠశాల ఉపాధ్యాయులు, గ్రామస్తులు, విద్యార్థులు తదితరులు పాల్గొన్నారు. ఈ సందర్భంగా పాఠశాల ప్రాంగణంలో నిర్వహించిన సాంస్కృతిక కార్యక్రమాలు పలువురిని ఆకట్టుకున్నాయి.