గుడివాడలో మున్సిపల్ ఎన్నికలకు అధికారుల కసరత్తు ముమ్మరం

గుడివాడ పురపాలక సంఘ ఎన్నికల నిర్వహణకు అధికారులు ఏర్పాట్లను వేగవంతం చేస్తున్నారు. ఇందులో భాగంగా ఆర్డీవో బాలసుబ్రమణ్యం అఖిలపక్ష నాయకులతో సమావేశం నిర్వహించి ఎన్నికల ఏర్పాట్లు, నామినేషన్ల స్వీకరణ, పోలింగ్ కేంద్రాల వివరాలను వెల్లడించారు. ఈ నెల 14వ తేదీ నుంచి నామినేషన్ల స్వీకరణ ప్రారంభం కానుందని తెలిపారు. గుడివాడ పురపాలక సంఘ పరిధిలోని 48 వార్డులకు ఎన్నికలు నిర్వహించనున్నట్లు పేర్కొన్నారు. కౌన్సిలర్ అభ్యర్థుల నామినేషన్లను మున్సిపల్ కార్యాలయంలో స్వీకరించేందుకు ఏర్పాట్లు చేయగా, చైర్మన్ అభ్యర్థుల నామినేషన్ల కోసం ఆర్డీవో కార్యాలయంలో ప్రత్యేక కౌంటర్లు ఏర్పాటు చేస్తున్నట్లు వివరించారు. ఎన్నికల నిర్వహణలో భాగంగా 34 ప్రాంతాల్లో 134 పోలింగ్ కేంద్రాలను సిద్ధం చేస్తున్నట్లు తెలిపారు. ప్రతి పోలింగ్ కేంద్రంలో సీసీ కెమెరాల ద్వారా నిఘా ఏర్పాటు చేయడంతో పాటు, కేంద్రాల వద్ద పటిష్టమైన భద్రతా చర్యలు చేపడుతున్నట్లు వెల్లడించారు. ఎన్నికల నియమావళిని రాజకీయ పార్టీలు, అభ్యర్థులు తప్పనిసరిగా పాటించాలని ఆర్డీవో బాలసుబ్రమణ్యం సూచించారు. ఎన్నికలు ప్రశాంత వాతావరణంలో, పారదర్శకంగా నిర్వహించేందుకు అన్ని చర్యలు తీసుకుంటున్నట్లు తెలిపారు.