దసరా కానుకగా ఈ నెల 20న వరంగల్ సూపర్ స్పెషాలిటీ ఆసుపత్రిలో ఓపీ సేవలు ప్రారంభం

వరంగల్: నగరంలోని సూపర్ స్పెషాలిటీ ఆసుపత్రిలో ఈ నెల 20వ తేదీన దసరా కానుకగా ఔట్ పేషెంట్ (ఓపీ) వైద్య సేవలు ప్రారంభించేందుకు అధికారులు ఏర్పాట్లు చేస్తున్నారు. ఈ మేరకు ఆసుపత్రిలో అవసరమైన సదుపాయాల కల్పన, వైద్య సిబ్బంది నియామకాలు, ఇతర ఏర్పాట్లపై దృష్టి సారించారు.

ఈ క్రమంలో శనివారం అధికారులు ఉద్యోగుల సర్దుబాటు చర్యలు చేపట్టారు. మరోవైపు ఆసుపత్రిలో వైద్య పరికరాల ఏర్పాటు, మౌలిక సదుపాయాల కల్పన పనులను పరిశీలించారు.

TGMSIDC జనరల్ మేనేజర్ డాక్టర్ రుక్మా రెడ్డి, ఎక్విప్‌మెంట్స్ వింగ్ మేనేజర్ డాక్టర్ అలేఖ్య, ఎంజీఎం ఆసుపత్రి సూపరింటెండెంట్ డాక్టర్ రాంకుమార్ రెడ్డి కలిసి ఆసుపత్రిలోని ఏర్పాట్లను తనిఖీ చేశారు. ఓపీ సేవల ప్రారంభానికి అవసరమైన ఏర్పాట్లను సకాలంలో పూర్తి చేయాలని సంబంధిత అధికారులు దృష్టి సారించారు.

ఓపీ సేవలు అందుబాటులోకి వస్తే వరంగల్‌తో పాటు పరిసర ప్రాంతాల ప్రజలకు వైద్య సేవలు మరింత చేరువయ్యే అవకాశం ఉంది.