ప్రోటోకాల్ ఉల్లంఘనపై ఎంపీడీఓకు ఉప సర్పంచ్ ఫిర్యాదు

నల్గొండ జిల్లా చిట్యాల మండల పరిధిలోని చిన్నకాపర్తి గ్రామ పంచాయతీలో ప్రోటోకాల్ ఉల్లంఘన జరిగిందని, దీనిపై చర్యలు తీసుకోవాలని కోరుతూ గ్రామ ఉప సర్పంచ్, వార్డు సభ్యురాలు బెల్లంకొండ లావణ్య శనివారం ఎంపీడీఓకు లిఖితపూర్వకంగా ఫిర్యాదు చేశారు. గ్రామ పంచాయతీ పరిధిలో శనివారం ప్రభుత్వ నిబంధనల ప్రకారం మొక్కల పంపిణీ కార్యక్రమాన్ని నిర్వహించారని ఆమె తెలిపారు. అయితే, స్థానిక వార్డు సభ్యురాలిగా, ఉప సర్పంచ్‌గా ఉన్న తనకు ఈ కార్యక్రమం గురించి ఎలాంటి ముందస్తు సమాచారం అందించలేదని ఆవేదన వ్యక్తం చేశారు. కనీస ప్రోటోకాల్ పాటించకుండా, ప్రజాప్రతినిధిని అనే గౌరవం లేకుండా కార్యక్రమాన్ని ముగించడంపై ఆమె తీవ్ర అభ్యంతరం వ్యక్తం చేశారు. నిబంధనలు ఉల్లంఘించిన వారిపై తగిన చర్యలు తీసుకోవాలని ఆమె డిమాండ్ చేశారు.