ప్రత్యేక పూజల పేరుతో మోసం.. పూజారి చామర్తి రామ లచ్చారావు అరెస్ట్

ప్రత్యేక పూజలు, ఆధ్యాత్మిక పరిహారాల పేరుతో భక్తుల నుంచి లక్షల రూపాయలు వసూలు చేసి మోసానికి పాల్పడిన ఆరోపణలపై పూజారి చామర్తి రామ లచ్చారావును పోలీసులు అరెస్ట్ చేశారు.

ఓ సాఫ్ట్‌వేర్ ఉద్యోగి ఇచ్చిన ఫిర్యాదు మేరకు కేసు నమోదు చేసిన బాచుపల్లి పోలీసులు దర్యాప్తు చేపట్టారు. ఈ క్రమంలో నిందితుడు అమెరికాలో ఉన్నట్లు గుర్తించిన పోలీసులు అతనిపై లుక్‌అవుట్ నోటీసు జారీ చేశారు.

అమెరికాలో కూడా ఇదే తరహా మోసాలకు పాల్పడినట్లు ఆరోపణలు ఎదుర్కొంటున్న చామర్తి రామ లచ్చారావు, అక్కడ అరెస్ట్ అవుతాననే భయంతో హైదరాబాద్‌కు వచ్చినట్లు సమాచారం.

శంషాబాద్ విమానాశ్రయంలో దిగిన వెంటనే ఇమ్మిగ్రేషన్ అధికారులు అతన్ని అదుపులోకి తీసుకుని బాచుపల్లి పోలీసులకు అప్పగించారు. అనంతరం పోలీసులు నిందితుడిని అరెస్ట్ చేసి కోర్టులో హాజరుపరచగా, రిమాండ్‌కు తరలించారు.