అమరావతిలో చెస్ అకాడమీ ఏర్పాటుకు సహకరించండి

మంత్రి నారా లోకేష్‌కు ప్రఖ్యాత చదరంగ క్రీడాకారిణి కోనేరు హంపి విజ్ఞప్తి

అమరావతి: రాజధాని అమరావతిలో చెస్ అకాడమీ ఏర్పాటుకు ప్రభుత్వం సహకారం అందించాలని ప్రఖ్యాత చదరంగ క్రీడాకారిణి కోనేరు హంపి కోరారు. ఈ మేరకు ఆమె తన తండ్రి అశోక్‌తో కలిసి శుక్రవారం ఉండవల్లిలోని నివాసంలో విద్య, ఐటీ శాఖల మంత్రి నారా లోకేష్‌ను కలిశారు.

ఇటీవల జరిగిన చెస్ ఒలింపియాడ్‌–2026 మహిళల విభాగంలో భారత జట్టు కాంస్య పతకం సాధించడంతోపాటు, వ్యక్తిగత విభాగంలో బోర్డు–1పై కోనేరు హంపి కాంస్య పతకాన్ని గెలుచుకున్నారు. ఈ విజయాల పట్ల మంత్రి నారా లోకేష్ ఆమెను అభినందించారు.

అమరావతిలో చెస్ అకాడమీని ఏర్పాటు చేయడం ద్వారా చదరంగ క్రీడను మరింత ప్రోత్సహించడంతోపాటు, ప్రతిభావంతులైన యువ క్రీడాకారులకు శిక్షణ, మార్గదర్శకత్వం అందించేందుకు అవకాశం ఉంటుందని కోనేరు హంపి వివరించారు. అకాడమీ ఏర్పాటుకు అవసరమైన సహాయ సహకారాలను ప్రభుత్వం తరఫున అందించాలని మంత్రిని కోరారు.

కోనేరు హంపి విజ్ఞప్తిపై నారా లోకేష్ సానుకూలంగా స్పందించారు. చెస్ అకాడమీ ఏర్పాటుకు ప్రభుత్వం తరఫున అవసరమైన సహాయ సహకారాలు అందిస్తామని భరోసా ఇచ్చారు. అమరావతిలో చదరంగ క్రీడ అభివృద్ధికి ఈ ప్రతిపాదన దోహదపడే అవకాశం ఉంది.