ఇంద్రకీలాద్రిపై రూ.100, రూ.200, రూ.500 దర్శనం టికెట్లు రద్దు

సామాన్య భక్తులకు ప్రాధాన్యం.. రూ.1,000 శీఘ్రదర్శనం టికెట్‌ మాత్రమే అందుబాటులో

విజయవాడ: ఇంద్రకీలాద్రిపై కొలువైన కనకదుర్గమ్మ దసరా శరన్నవరాత్రి ఉత్సవాలకు ఏర్పాట్లు పూర్తయ్యాయి. అక్టోబర్‌ 11 నుంచి ప్రారంభం కానున్న ఉత్సవాల్లో సామాన్య భక్తులకు ప్రాధాన్యం కల్పించేలా దర్శన ఏర్పాట్లు చేసినట్లు సమాచారం. ఇందులో భాగంగా రూ.100, రూ.200, రూ.500 దర్శనం టికెట్లను రద్దు చేసి, రూ.1,000 శీఘ్రదర్శనం టికెట్లను అందుబాటులో ఉంచనున్నారు.

ఉత్సవాల తొలిరోజు ఉదయం 8 గంటల నుంచి సర్వదర్శనానికి భక్తులను అనుమతించనున్నారు. ప్రొటోకాల్‌ పరిధిలోని వీఐపీలకు ఉదయం 6 గంటల నుంచి 8 గంటల వరకు మాత్రమే అంతరాలయ దర్శనం కల్పించనున్నట్లు సమాచారం. దసరా ఉత్సవాలకు పెద్ద సంఖ్యలో భక్తులు తరలివచ్చే అవకాశం ఉండటంతో దర్శన ఏర్పాట్లు, భక్తుల రద్దీ నియంత్రణపై అధికారులు దృష్టి సారించారు.